არც კაცისგან და არც ქალისგან ღირსეულ საქციელად არ მიმაჩნია ისაუბრო იმაზე, რაც კულუარებში და დახურულ ფორმატში ხდება, – განაცხადა “ქართული ოცნების“ წევრმა ეკა ბესელიამ.
ბესელიას თქმით, უსუფაშვილის მიერ ბოლო პერიოდში გაკეთებული განცხადებებით გაოცებული და გაკვირვებულია.
“გაოცებული და გაკვირვებული ვარ იმ განცხადებებით, რასაც დავით უსუფაშვილი აკეთებს. მან რამდენიმე დღის წინ თქვა, რომ არ ვარგა, როცა ქვეყანაში სერიოზული პოლიტიკოსები და ლიდერები ჭორაობენ. მთელი მისი საუბარი ამ ჭორაობას დაემსგავსა. ყველაფერი, რასაც გიყვებიან, რაც მოგისმენია, რაც გადაგხდენია, რაც სამუშაო პროცესის მიღმა ხდება და რამდენი რამე გაგვიგია, ავდგეთ და ეს ყველაფერი საჯაროდ მოვყვეთ, ან პოლიტიკური ვითარება რას დაემსგავსება, ან პოლიტიკური ლიდერები?! ეს ყველაფერი რას ჰგავს?! გულწრფელად რომ გითხრათ, არც კაცისგან და არც ქალისგან ღირსეულ საქციელად არ მიმაჩნია ისაუბრო იმაზე, რაც კულუარებში და დახურულ ფორმატში ხდება, რადგან არის საჯარო სივრცე, სადაც შეიძლება ბევრ რამეზე ისაუბრო, მაგრამ სხვა სივრცე არსებობს, სადაც რაღაცეები რომ ხდება, ყველაფერი არ უნდა ილაპარაკო. რასაც ვისმენ, გაოცებული ვარ!“, – განუცხადა ჟურნალისტებს ეკა ბესელიამ.
მისივე შეფასებით, ის, რის თაობაზეც თავად ბიძინა ივანიშვილი მედიის წარმომადგენლებთან შეხვედრებისას საუბრობს, “უფრო საჯარო სივრცის ნაწილია და ივანიშვილი ფაქტების ანალიზს ერთიან კონტექსტში აკეთებს“.
“არ მგონია, რომ ეს იგივე იყოს, რასაც უსუფაშვილისგან ვისმენთ. თუკი უსუფაშვილს ის არ მოსწონდა, რასაც ივანიშვილი საუბრობდა და ამას ჭორაობა უწოდებდა, მთელი ამ დღეების განმავლობაში, მისი ლაპარაკი რას ჰგავს?! თუ ეს მართლა ჭორაობა არ არის, რა ჰქვია იმას, როცა პოლიტიკური ლიდერები ასეთი საუბრის ნიუანსებს საჯაროდ ჰყვებიან?! გულწრფელობის მომხრე ვარ, მაგრამ რაღაცეები არის, რაც დახურულია. ყველაფერი თუ უნდა მოვყვეთ, რაც გაგვიგია, პოლიტიკური პროცესი საშინელ ფონს და ფერებს მიიღებს“, – განაცხადა ეკა ბესელიამ.