მე ვთვლი ჩემს თავს პასუხისმგებლად არა მხოლოდ კონსტიტუციით, მორალურად, რომ ყველაფერი გავაკეთო, რათა სტაბილურად მივიდეთ არჩევნების დღეს, ამისთვის გადავდგი თავის დროზე ის რთული, მძიმე ნაბიჯი, რომელსაც შეწყალება ერქვა,- განაცხადა საქართველოს პრეზიდენტმა სალომე ზურაბიშვილმა, რომელმაც საკონსტიტუციო ცვლილებებს ხელი მოაწერა. როგორც მან აღნიშნა, სჯერა, რომ ოქტომბერში მშვიდობიანი, სამართლიანი, გამჭვირვალე არჩევნები ჩატარდება.
„მე არ მიმიღია ეს გადაწყვეტილება იმიტომ, რომ რამე ეწერა რომელიმე შეთანხმებაში, რომელშიც მე არ ვმონაწილეობდი და არ ვთვლიდი, რომ ვიყავი პასუხისმგებელი. მე მივიღე ეს გადაწყვეტილება იმიტომ, რომ ეს ემსახურებოდა ქვეყნის სტაბილურობას, დღეს სწორედ გამყარდა ქვეყნის სტაბილურობა.
ვიცით, რომ გველოდება რთული პერიოდი. ჩვენი წარმატებები ამ პანდემიის დროს, ჩვენი დღევანდელი სტაბილურობა ბევრს შეიძლება, არ აწყბოდეს და ბევრი გამოწვევა კიდევ იქნება იმ გზაზე, რომელიც მიგვიყვანს არჩევნებამდე.
ამ გამოწვევებს გავუმკლავდებით ყველანი ერთად და მე მჯერა, რომ ჩავატარებთ მშვიდობიან, სამართლიან, გამჭვირვალე არჩევნებს, როგორც არის დაგეგმილი. ისიც მჯერა, რომ ამაში პანდემია ხელს ვერ შეგვიშლის“, – აღნიშნა სალომე ზურაბიშვილმა.