ირაკლი ღარიბაშვილმა ბიძინა ივანიშვილის მიღწევებზე ისაუბრა და აღნიშნა, რომ თუ დღეს ნებისმიერი მოქალაქე არის თავისუფალი, ეს ბიძინა ივანიშვილის დამსახურებაა. ამის შესახებ თავდაცვის მინისტრმა ჟურნალისტებს განუცხადა.
„ბიძინა ივანიშვილის მიღწევები პოლიტიკურ ცხოვრებაში ძალიან ბევრია, ძირითადი მიღწევები შეიძლება რამდენიმე კატეგორიად დაიყოს, პირველს გამოვყოფდი იმას, რომ რამდენიმე წლის წინ, 2012 წელს ყველა მოქალაქისთვის სანატრელი იყო თავისუფლება, სწორედ ეს თავისუფლება მისცა ბიძინა ივანიშვილმა და დაამკვიდრა სამართლიანობა, კანონი და წესრიგი, ეს არის მთავარი ფუნდამენტური მონაპოვარი პოლიტიკაში ბატონი ბიძინა ივანიშვილის მოღვაწეობისა“, – განაცხადა ირაკლი ღარიბაშვილმა.
მანამდე ცნობილი გახდა, რომ პარტიის ყოფილი თავმჯდომარე, ბიძინა ივანიშვილი პოლიტიკიდან მიდის. ამის შესახებ მან წერილი გამოაქვეყნა.