ევროკავშირი არაწევრი ქვეყნებიდან ჩასული პირებისთვის რეგულაციების გამკაცრებას განიხილავს. აღნიშნული წინადადებით ევროკომისია გამოდის.
უწყებაში მიიჩნევენ, რომ კორონავირუსის ახალი ვარიანტები და მსოფლიოში ჯანდაცვის არასტაბილური მდგომარეობა შემდგომი ზომების მიღებას მოითხოვს ევროკავშირში უსაფრთხო მოგზაურობის უზრუნველსაყოფად.
კერძოდ, ევროკომისიის ინიციატივის თანახმად, ევროკავშირის წევრმა სახელმწიფოებმა PCR-ტესტის უარყოფითი პასუხი უნდა მოითხოვონ, რომელიც მგზავრმა გამგზავრებამდე 72 საათით ადრე უნდა გაიაროს. ევროკავშირის მოქალაქეებს, რეზიდენტებსა და მათი ოჯახის წევრებს ტესტის ჩაბარების შესაძლებლობა ევროკავშირის ტერიტორიაზე შესვლის შემდეგ უნდა ჰქონდეთ. სავალდებულო ტესტირებასთან ერთად ისეთი ზომერბიც განიხილება, როგორიცაა თვითიზოლაცია, კარანტინი და კონტაქტების გამოვლენის მოთხოვნა.
გარდა ამისა, ევროკომისიაში მიიჩნევენ, რომ ევროკავშირის არაწევრი ქვეყნებიდან მოგზაურების მისაღებად აუცილებელია რამდენიმე კრიტერიუმის გათვალისწინება, მათ შორის, ევროკავშირის არაწევრ ქვეყანაში ინფექციის გავრცელების მაჩვენებელი და ჩატარებული ტესტების რაოდენობა.
აღსანიშნავია, რომ ევროკომისიის წინადადება ევროკავშირის საბჭომ უნდა განიხილოს.