უკრაინის პრემიერ-მინისტრმა, დენის შმიგალმა განაცხადა, რომ უკრაინას ნატოს წევრობის სამოქმედო გეგმის (MAP) მიღება საქართველოსთან ერთად სურს.
„დღეისთვის, ჩვენი მოკლევადიანი სტრატეგია წევრობის სამოქმედო გეგმის მიღებაა. გვსურს, არ ჩამოვრჩეთ საქართველოს და MAP-ი საქართველოსთან ერთად მივიღოთ. ამაზე აქტიურად ვმუშაობთ“, – აღნიშნა უკრაინის პრემიერ-მინისტრმა იენს სტოლტენბერგთან მოლაპარაკებების შემდეგ გამართულ ერთობლივ პრესკონფერენციაზე.
დენის შმიგალმა ხაზგასმით აღნიშნა, რომ ნატოს წევრობა უკრაინის მნიშვნელოვანი პრიორიტეტია და რომ ალიანსში გაწევრიანების განზრახვა უკრაინის კონსტიტუციაშია გაწერილი.
„ჩვენ აბსოლუტურად მზად ვართ და საშინაო დავალებებს ვასრულებთ. განვაგრძობთ შეიარაღებული ძალების რეფორმირებას, ნატოს სტანდარტებზე გადასვლასა და ერთობლივი წვრთნების ჩატარებას“, – აღნიშნა უკრაინის პრემიერმა.