მსოფლიოში Covid-19 ის შემთხვევები ისევ მატულობს, ბოლო 24 საათში 400 000-ზე მეტი შემთხვევა გამოვლინდა, გარდაიცვალა 11 000 პაციენტი. სტატისტიკის მატებასთან ერთად ქვეყნები რეგულაციებს კიდევ უფრო ამკაცრებენ.
აშშ-მა მექსიკასა და კანადასთან სახმელეთო საზღვარზე სამოგზაურო შეზღუდვები 21 მარტამდე გაახანგრძლივა.
კანადის ხელისუფლებამ ქვეყანაში სახმელეთო გზით შესული მოქალაქეებისთვის კორონავირუსზე უარყოფითი ტესტის წარდგენა სავალდებულო გახადა. საზღვრებს დროებით ხურავენ ევროპაშიც, დანიამ გერმანიასთან საზღვარი ნაწილობრივ ჩაკეტა.
დანიის იუსტიციის მინისტრის, ნიკ ჰეკერუპის განცხადებით, აღნიშნული გადაწყვეტილება ქვეყანაში კორონავირუსის შემთხვევების გავრცელების აღკვეთის მიზნით მას შემდეგ მიიღეს, რაც ქალაქ ფლენსბურგში, რომელიც დანიის საზღვართან ახლოს მდებარეობს, ახალი კლასტერი გაჩნდა.
მსოფლიოში ბოლო მონაცემებით, Covid-19-ი 111 მილიონ ადამიანს დაუდასტურდა, დაღუპულთა რიცხვი 2 მილიონ 460 ათასს აჭარბებს.