„2008 წლიდან ყველა ის ცვლილება გატარდა კონსტიტუციაში, რაც აწყობდა სააკაშვილს. შედეგად მივიღეთ ძალიან ხარვეზიანი კონსტიტუცია. გიორგი მარგევლაშვილისა და მთავრობის დაპირისპირებაც, ამ ხარვეზის ერთ-ერთი გამოხატულებაა. როდესაც ნაციონალებმა დაკარგეს ძალაუფლება, ვნახეთ, რომ პარლამენტის თბილისში გადმოტანაზეც კი არ თანხმდებოდნენ”, – აცხადებს პოლიტოლოგი რამაზ საყვარელიძე for.ge-სთან ინტერვიუში:
”დღესაც, ”ნაციონალები” ყველაფერს გააკეთებენ იმისათვის, რომ არ გატარდეს საკონსტიტუციო ცვლილებები და კონსტიტუცია იმ სახით დარჩეს, როგორიც მიშას ხათრით მიიღეს ნაჩქარევად. აი, ასეთი მოტივებით მიღებული კონსტიტუცია გვაქვს დღეს.
თუკი კონსტიტუციური ცვლილებები არ მოხდება, ეს კონსტიტუცია ბევრ უბედურებას გადაკიდებს ქვეყანას. რა უფრო დიდი დანაშაულია – შესაძლო საფრთხე, თუ კონსტიტუციის იმ სახით დატოვება, რა სახითაც ახლა არსებობს და რომლის შეცვლას არ დათანხმდება „ნაციონალური მოძრაობა“?
ნაციონალებისგან იმის განცხადება, რომ „ქართული ოცნების“ ხელში სახიფათოა კონსტიტუციური უმრავლესობა, ეს მხოლოდ ღიმილისმომგვრელია. თვითონ იყვნენ ამ უმრავლესობის მქონენი და მაქსიმალურად უარყოფითად გამოიყენეს კონსტიტუცია, ახლა კი, სხვის ხიფათზე მიუთითებენ.
მათი მოტივი გასაგებია, მაგრამ სრულიად გაუგებარია იმ პარტიების მოტივი, რომლებიც ყელმოღერებული გაიძახიან, რომ ხმა არ მისცეთ „ქართულ ოცნებასო“. ეს ნიშნავს, რომ ხმას აძლევენ „ნაციონალურ მოძრაობას“. ასეთი შეუგნებლობით და ვითომ პოლიტიკური წაეშმაკობით სახეზე გვაქვს „ნაციონალური მოძრაობის“ შენიღბული მხარდაჭერა. ისინი, ამ შემთხვევაში ხელმძღვანელობენ არა ქვეყნის კეთილდღეობით, არამედ პოლიტიკური მოტივით. მათთვის მთავარია არ იყოს „ქართული ოცნება“. 4 წლის განმავლობაში „ქართულ ოცნებას“ ძალადობა არ ჰქონია არც ერთი მიმართულებით, მაშინ როდესაც მმართველობის 4 წლის თავზე „ნაციონალურ მოძრაობას“ უზარმაზარი გამოცდილება ჰქონდა დამოუკიდებელი ტელევიზიების დახურვის, საპროტესტო აქციების დაშლის და ანგარიშსწორების“, – აღნიშნა for.ge-სთან საუბრისას რამაზ საყვარელიძემ.
წყარო: for.ge