”ქართული ოცნების” ერთ-ერთი ლიდერის, სოზარ სუბარის თქმით, ”ქართული ოცნების” კანდიდატებმა განმეორებითი კენჭისყრა ზუგდიდის სამივე უბანზე მოიგო, მარნეულში, ყიზილაჯლოს 48-ე უბანზე კი „ნაციონალურ მოძრაობასთან“ 58 ხმით დამარცხდა.
”70%-30%-ზე არის შედეგი ზუგდიდის სამივე უბანზე, დამაჯერებელი გამარჯვება მოიპოვა ”ქართულმა ოცნებამ”. 58 ხმით წავაგეთ ყიზილაჯლოს 48-ე საარჩევნო უბანზე. ეს არის მეორე ტურის თემა, ყველა შემთხვევაში მეორე ტური იქნებოდა და დარწმუნებული ვარ, მეორე ტურში გამარჯვება იქნება.
პირველი, რაც უმთავრესი იყო და რასაც მთელი დღე ვამბობდი, ქვასროლია პარტიას არ მივეცით საშუალება რაიმე პროვოკაცია გაეკეთებინა, სიტყვიერად კი სცადეს დაძაბულობა, მაგრამ სხვა ვერაფერი ვერ გააკეთეს. მეორე ტური იქნება ისეთივე მშვიდი, წყნარი და დარწმუნებული ვარ, გამარჯვებაში არა მხოლოდ აქ, არამედ საქართველოს 50-ვე ოლქში, სადაც არის მეორე ტური.
მთელ პარტიას, რომელიც ამბობდა, რომ 8 ოქტომბერს დაამთავრებდა ხელისუფლებას და მოვიდოდა, ახლა ერთადერთი ოცნება დარჩა – 27 მანდატს ერთი მანდატი მაინც მიუმატონ. ეს დარჩა ”ნაციონალურ მოძრაობას” ოცნებად, სხვა ოცნება აღარ აქვს”, – განაცხადა სოზარ სუბარმა.