პრემიერ-მინისტრმა ირაკლი ღარიბაშვილმა დღეს ასპინძაში, ახალქალაქსა და ნინოწმინდაში “ქართული ოცნების” კანდიდატები წარადგინა.
ქვეყნის მეთაურმა ცოტა ხნის წინ პირად გვერდზე პოსტი გამოაქვეყნა.
“დღეს მერობის კანდიდატები წარვადგინე: ასპინძაში – როსტომ მაგრაქველიძე, ახალქალაქში – მელქონ მაკარიანი, ნინოწმინდაში – ანივარდ მოსოიანი.
ძალიან ბევრი პროექტი განვახორციელეთ მთელ ქვეყანაში და სამცხე-ჯავახეთის რეგიონში. აბასთუმნის ურბანული განახლების მეორე ეტაპის სამუშაოები, რომლის ღირებულებაც 47 მილიონი ლარია, აქტიურად მიმდინარეობს. აბასთუმნის ობსერვატორიის რეაბილიტაციის დასრულებისთვის 10 მილიონამდე ლარს გამოვყოფთ. ობსერვატორიის ცენტრალურ ტელესკოპსა და ციფრულ მუზეუმს ჩაუტარდება რეაბილიტაცია და მოხდება მისი აღჭურვა. უკვე დასრულდა 1982 წელს აშენებული საბაგირო გზის რეაბილიტაცია. სულ, აბასთუმნის ინფრასტრუქტურის განვითარებას მოხმარდება 315 მილიონი ლარი.
მიმდინარეობს და კიდევ დაგეგმილია სასტუმროების მშენებლობა, რომელსაც სხვადასხვა ბიზნეს ჯგუფები ახორციელებენ. ჯამში აღნიშნული პროექტების საინვესტიციო ღირებულება 442 მილიონ ლარამდეა.
ბაღდათი-აბასთუმნის გზის რეაბილიტაცია-რეკონსტრუქციის სამუშაოები აქტიურად მიმდინარეობს. პროექტის საერთო ღირებულება 210 მილიონ ლარს შეადგენს. მსოფლიო ბანკის მხარდაჭერით, დასრულდა აბასთუმანში, ცენტრალურ ქუჩაზე არსებული მე-19, მე-20 საუკუნეებში აშენებული სახლების რეაბილიტაცია. ვარძიის რეაბილიტიაცია სრულად დააფინანსა ფონდმა “ქართუმ” და ბიძინა ივანიშვილმა და ეს პროცესი გრძელდება.
ძალიან ბევრი საქმე გაკეთდა ყველა მიმართულებით და პროგრესი და სიკეთე მართლაც ხელშესახებია, იქნება ეს ინფრასტრუქტურა, გზების მოწესრიგება, გაზიფიცირების სამუშაოები, წყალმომარაგების პროექტები, სოფლის მეურნეობის თუ ადგილობრივი წარმოების მიამრთულებით უამრავი პროექტი დაფინანსდა. ჩვენ ვაპირებთ, კიდევ უფრო მეტი გავაკეთოთ ხალხისთვის.
ჩვენი მთავარი გამოწვევაა უმუშევრობა, სიღარიბე, რომელიც ჩვენი მთავრი საზრუნავი უნდა იყოს. სოფლის მეურნეობის მიმართულებით ვგეგმავთ 7 მილიარდი ლარის ინვესტირებას სოფლის მეურნეობის მიმართულებით. ჩვენი გეგმის მიხედვით, არც ერთი გოჯი მიწა არ უნდა დარჩეს დაუმუშავებელი. ძალიან ამბიციური გეგმები გვაქვს ინფრასტრუქტურის განვითარების მიმართულებით – გზების მშენებლობა, წყალგაყვანილობა, გაზიფიცირება.
ჩვენ შევძელით ბოლო 7 არჩევნებში ღირსეული და დამაჯერებელი გამარჯვება და ახლა ვემზადებით ასევე ღირსეული და ძლიერი გამარჯვებისთვის 2 ოქტომბერს. ამ არჩევნების ჩატარებით, კიდევ ერთხელ ბეჭედს დავუსვამთ სტაბილურობას, მშვიდობას და განვითარების ახალ ეტაპს დავიწყებთ ქვეყანაში, მასშტაბური განვითარების ეტაპს, ყველა რეგიონში, ყველა ქალაქში და მუნიცაპალიტეტში”