პრეზიდენტისთვის ქვეყანაში მიმდინარე პროცესებზე „ეროვნული ფორუმის“ არათანმიმდევრული დამოკიდებულება გაუგებარია, – ამის შესახებ დღეს გამართულ პრესკონფერენციაზე პრეზიდენტის პრესსპიკერმა ეკატერინე მიშველაძემ განაცხადა, რომელმაც დააფიქსირა პრეზიდენტის პოზიცია პარტია „ეროვნული ფორუმის“ ბოლო განცხადებაზე, რომელიც ე. წ. კაბელების საქმეს ეხებოდა.
„გავიხსენებ გუბაზ სანიკიძის განცხადებას, მოკლე მეხსიერებასთან დაკავშირებით, რომელიც მან პრეზიდენტის საპარლამენტო გამოსვლისას აღნიშნა. დიახ, არ უნდა გვქონდეს მოკლე მეხსიერება და ჩვენ ყველას გვახსოვს „ეროვნული ფორუმის“ პოზიციები ქვეყნისთვის მნიშვნელოვან საკითხებზე, როგორებიცაა საკონსტიტუციო სასამართლოს კანონპროექტზე ხმის მიცემა პრეზიდენტის ვეტოებთან დაკავშირებით, რომელთა სისწორეში საზოგადოება არაერთხელ დარწმუნდა. ასევე უზენაეს სასამართლოში მოსამართლეების დანიშვნასთან დაკავშირებით. სწორედ ამ ფაქტებიდან გამომდინარე, პრეზიდენტს ნამდვილად არ სჭირდება მოწოდება, თუ როგორ მოიქცეს ამ კონკრეტულ საქმესთან მიმართებაში“, – განაცხადა ეკა მიშველაძემ.
მისივე თქმით, პრეზიდენტისთვის ასევე გაუგებარია, რატომ დაინახა „ეროვნულმა ფორუმმა“ მხოლოდ ახლა პრობლემები სასამართლო სისტემაში, მაშინ, როდესაც „ეროვნული ფორუმის“ წარმომადგენლების მხრიდან არაერთხელ მოგვისმენია სრულიად საპირისპირო პოზიციები.