„საქართველოსთვის ისტორიული მომენტია და ქვეყანას იმ პრობლემების გადაჭრაში უნდა დავეხმაროთ, რომლებიც ევროკომისიამ, ევროკავშირმა და ევროპარლამენტმა დაასახელეს. ვფიქრობ, რომ სვენ მიქსერის ანგარიშიც შეიძლება დაგვეხმაროს“, – ამის შესახებ ევროპარლამენტარმა ანდრიუს კუბილიუსმა განაცხადა.
მან საქართველოში დეპოლარიზაციის პრობლემაზე გაამახვილა ყურადღება.
„საქართველოს მმართველი გუნდი და ხელისუფლება ვერ იგებს ან ისე წარმოაჩენენ, რომ ვერ იგებენ, რას ნიშნავს ევროკომისიის მიერ წარმოდგენილი 12 პუნქტი. პირველი პუნქტი დეპოლარიზაციაზე საუბრობს და შარლ მიშელის შეთანხმებაზე და როგორც ვხედავთ, ხელისუფლება საპირისპიროს აკეთებს. მათ შექმნეს სპეციალური კომისია და თუ მოისმენთ მათ განცხადებებს, ისინი პოლარიზაციის ტემპერატურას ზრდიან. ისინი ყველას ადანაშაულებენ- ოპოზიციას, სამოქალაქო სექტორს, აშშ-ის ელჩს საქართველოში, ევროკავშირს და ამბობენ, თითქოს ჩვენ გვინდა საქართველოს ომში ჩართვა. არ ვიცი, რა ვუწუდო ამას, სრული ნონსენსია. ეს კრემლის პროპაგანდას ჰგავს. კრემლი ამბობს, რომ დასავლეთია ყველაფერში დამნაშავე და საქართველოს მმართველი გუნდიც ძალიან მსგავს რამეს ამბობს. ჩვენ ეს ანგარიში უნდა გამოვიყენოთ 12 პუნქტის ასახსნელად. ვთქვათ თუ რას ნიშნავს დეპოლარიზაცია, დეოლიგარქიზაცია. ოლიგარქია ადამიანი, რომელსაც აქვს ბევრი ფული, რომელიც იტაცებს სახელმწიფოს და შეუძლია, ყოფილი პირადი მცველები, ასისტენტები და მრჩევლები მინისტრებად ან პრემიერებად დანიშნოს. ასეთი ერთი ადამიანია საქართველოში და ჩვენ ვიცით მისი სახელი – ბიძინა ივანიშვილი. იქნებ, ეს ანგარიში გამოვიყენოთ, რათა ავუხსნათ საქართველოს ხელისუფლებას, თუ რას ველოდებით“, – განაცხადა კუბილიუსმა.
ევროპარლამენტის საგარეო ურთიერთობათა კომიტეტმა საქართველოს შესახებ ესტონელი დეპუტატის, სვენ მიქსერის მიერ მომზადებული ანგარიში მოისმინა. მოხსენება ასოცირების ხელშეკრულებით ნაკისრი ვალდებულებების შესრულებას ეხება და საბოლოო სახეს სექტემბერში მიიღებს. დეპუტატებმა ევროპული საბჭოს მიერ მიღებულ გადაწყვეტილებაზე, კანდიდატის სტატუსის მისაღებად საქართველოსთვის წარდგენილი 12 პუნქტის შესრულებაზე ისაუბრეს. მომავალ კვირას კომიტეტი თბილისს ეწვევა.