მცხეთის რაიონულ სასამართლოში 20 წლის მირიან კუკავას მკვლელობის ბრალდებით დაკავებული დავით ჯიჯეიშვილისა და კიდევ 8 პირის სასამართლო პროცესი მიმდინარეობს, სადაც მათ მიმართ შეფარდებული აღკვეთის ღონისძიების გადასინჯვა მიმდინარეობს.
ჯგუფური ხულიგნობის ბრალდებით დაკავებული დავით ხარჭიაშვილი თავს დამნაშავედ არ მიიჩნევს. მისი თქმით, მოკლული ახალგაზრდა მისი მეგობარი იყო და მისი გადარჩენა ვერ შეძლო.
“მირიანი ჩემი ბავშვობის ძმაკაცი იყო, ძალიან მძიმედ გადამაქვს მისი ჩემს გვერდით არყოფნა, ხულიგნობის ბრალდებაში მე დამნაშავედ არ ვგრძნობ თავს, დამნაშავედ ვგრძნობ თავს, ჩემ ძმაკაცს ყურადღება რომ დავაკელი და სიკვდილმა ხელიდან წამართვა”,- განაცხადა ხარჭიაშვილმა.
ხულიგნობაში თავს დამნაშავედ არ გრძნობს კიდევ ერთი ბრალდებული, ირაკლი ასლანაძეც.
„მე თავს ხულიგნობაში დამნაშავედ არ ვცნობ, ვფიქრობ, რომ დამნაშავე ვარ და არა მხოლოდ მე ვარ დამნაშავე, რომ სიტუაციის განეიტრალება ვერ მოვახერხე და უფრო დაკვირვებული რომ ვყოფილიყავი, ჩემი ბავშვობის მეგობარი არ გარდაიცვლებოდა”,- განაცხადა ასლანაძემ.
ცნობისთვის, შემთხვევა ცხვარიჭამიაში ორი თვის წინ მოხდა. 20 წლის მირიან კუკავა მეგობრის – ქეთათო არაბულის სახლში, დაბადების დღეზე იმყოფებოდა, რა დროსაც სუფრასთან ახალგაზრდებს შორის სიტყვიერი დაპირისპირება მოხდა, რა დროსაც მირიან კუკავას გულ-მკერდის არეში დანით ჭრილობა მიაყენეს. ის შემთხვევის ადგილზე გარდაიცვალა.