ამერიკის პირველი ლედი მიშელ ობამა მიიჩნევს, რომ ქვეყნის პრეზიდენტად დონალდ ტრამპის არჩევის შემდეგ, ხალხმა გაიგო რას ნიშნავს უიმედობა, ამის შესახებ ინფორმაციას CNN ავრცელებს.
ჩვენ ახლა უკვე ვგრძნობთ განსხვავებას. ახლა ვიცით, როგორია უიმედობის განცდა – განაცხადა მიშელ ობამამ ოპრა უინფრისთან ინტერვიუში.
„იმედი ძალიან მნიშვნელოვანია. მე და ბარაკს, ასევე ბევრ ადამიანს სჯერა, რომ რა უნდა გააჩნდეს ადამიანს, თუ იმედი არ ექნება. რა უნდა მისცე შენს შვილებს, თუ მათთვის იმედის მიცემა არ შეგიძლია?“ – განაცხადა აშშ-ს პირველმა ლედიმ.
მიშელ ობამა დარწმუნებულია, რომ მისი მეუღლე ამერიკელებს მისცემს ისეთ რამეს, რაც მათ რწმენას დაუბრუნებს.
CNN-ს ინფორმაციით, ამერიკელების 38%, ანუ სამიდან ერთი ადამიანი ფიქრობს, რომ დონალდ ტრამპი „ცუდი ან საშინელი“ პრეზიდენტი იქნება – ამის შესახებ ეროვნული კვლევა „პიუს კვლევითმა ცენტრმა“ დეკემბერში ჩაატარა.
BBC-ს ინფორმაციით, ამერიკის პოლიტიკურ რეალობაში მიშელ ობამა ძალიან პოპულარული ფიგურაა. გამოცემის ცნობით, „გალაპის“ კვლევით მისი რეიტინგი 64%-ს შეადგენს და აღემატება როგორც დონალდ ტრამპის, ასევე ჰილარი კლინტონისა და მისი მეუღლის რეიტინგებს.
როგორც BBC წერს, მიშელ ობამამ მნიშვნელოვანი როლი ითამაშა აშშ-ს საპრეზიდენტო არჩევნებში, სადაც ის მხარს დემოკრატების კანდიდატ ჰილარი კლინტონს უჭერდა. ამის გამო რესპუბლიკელებმა პირველი ლედი დაადანაშაულეს, რომ კლინტონის საარჩევნო კამპანიაში ზედმეტად ბევრ დროს ხარჯავდა.
მიშელ ობამამ ოპრა უინფრისთან ინტერვიუს დროს აშშ-ს არჩეული პრეზიდენტი სახელით არ მოიხსენია, თუმცა მან რამდენჯერმე გაიმეორა, რომ ამერიკას თეთრ სახლში სჭირდება ზრდასრული ადამიანი. მისი თქმით, ქვეყნის პრეზიდენტს უნდა შეეძლოს სტაბილურობის უზრუმველყოფა.
http://1tv.ge/