ალეპოს მშვიდობიანი მოქალაქეების მხარდასაჭერად, ვაშინგტონში, თეთრი სახლის წინ დემონსტრაცია გაიმართა. ”ამერიკის ხმის” ქართული რედაქციის ინფორმაციით, აქცია ამერიკაში მცხოვრები სირიელების ორგანიზებით ჩატარდა. როგორც გამოცემა წერს, უკანასკნელი კვირის განმავლობაში სირიის სამთავრობო ძალებმა რუსეთის დახმარებით ალეპოს უდიდესი ნაწილი დაიკავეს.
”მეამბოხეები, რომლებიც ექვსი წელია, ასადის რეჟიმს ებრძვიან, ქალაქის მხოლოდ ერთ პროცენტს აკონტროლებენ. 25 ათასამდე ადამიანი ალყაშია და ქალაქიდან გაღწევას ვერ ახერხებს. ვაშინგტონის გარდა, საპროტესტო გამოსვლები გაიმართა სტამბულში, პარიზსა და მსოფლიოს სხვა ქალაქებში.
აქციის მონაწილეებმა თეთრ სახლთან პერფორმანსი გამართეს, სადაც ისინი ნანგრევებში და სამშენებლო მტვერში დაღუპულ ადამიანებს განასახიერებდნენ. დემონსტრაციის ორგანიზატორები თეთრ სახლს სთხოვდნენ, არ დახუჭოს თვალი სირიაში მიმდინარე ჰუმანიტარულ კატასტროფაზე. თეთრი სახლის შემდეგ აქციის მონაწილეები აშშ-ში რუსეთის ელჩის რეზიდენციისკენ გაემართენ. მათ კრემლს მშვიდობიანი მოქალაქეების მკლელობაში დასდეს ბრალი და მოუწოდეს, შეწყვიტოს ასადის რეჟიმის მხარდამჭერა”, – ნათქვამია ინფორმაციაში.