სირიაში მოსახლეობის ევაკუაციისთვის განკუთვნილი ავტობუსები დაწვეს

სირიაში რამდენიმე ავტობუსს, რომლითაც ავადმყოფი და დაშავებული ადამიანების ევაკუაცია უნდა განხორციელებულიყო, თავს დაესხნენ და გადაწვეს. “ბი-ბი-სის” ინფორმაციით, ავტობუსები, რომლებიც იდლიბის პროვინციაში მდებარე ორი შიიტური სოფლისკენ მიემართებოდა, ხელისუფლების მოწინააღმდეგე ერთ-ერთმა დაჯგუფებამ ალყაში მოაქცია.
სირიის სახელისუფლებო მედიის ცნობით, მომხდარის მიუხედავად, ავტობუსებს ალეპოდან მშვიდობიანი მოსახლეობა გამოჰყავს.
ალეპოდან ევაკუაციას ამ დრომდე ათასობით მოქალაქე და ამბოხებული ელოდება. სირიაში, ალეპოს აღმოსავლეთ რაიონებიდან მოსახლეობის ევაკუაცია მხარეებს შორის მიღწეული ახალი შეთანხმების საფუძველზე 17 დეკემბერს უნდა განახლებულიყო.
სირიაში კონფლიქტი 2011 წლის მარტში დაიწყო, როდესაც სირიის ქალაქ დერააში კედლებზე ანტისახელისუფლო ლოზუნგები გამოჩნდა. პოლიციამ ოპოზიციის აქტივისტები დააკავა და ციხეში სასტიკად სცემა, რის პასუხადაც ადგილობრივმა მცხოვრებლებმა სამთავრობო დაწესებულებების დარბევა დაიწყეს.
სამთავრობო ძალებმა დემონსტრანტებს ცეცხლი გაუხსნეს, რის შედეგადაც ათობით ადამიანი დაიღუპა. სწორედ ამის შემდეგ დაიწყო ბაშარ ასადის რეჟიმის რღვევა. ტრაგიკულ ინციდენტს სირიის დიდ ქალაქებში მასშტაბური საპროტესტო აქციები მოჰყვა. თურქეთში გაქცეულმა სირიელმა გენერლებმა “სირიის თავისუფალი არმია” შექმნეს, რითაც სირიაში სამოქალაქო დაპირისპირება დაიწყო. არაოფიციალური მონაცემებით, კონფილიქტმა, 200 ათასზე მეტი ადამიანი იმსხვერპლა, 10 მილიონამდე კი, ლტოლვილი გახდა.