2023 წელს ევროკავშირი კიევს ყოველთვიურად მილიარდნახევარი ევროს ოდენობის დახმარებას გაუწევს – ამის შესახებ ბრიუსელში ევროკომისიის ხელმძღვანელმა ურსულა ფონ დერ ლაიენმა ევროკავშირის 27 ქვეყნის ლიდერების მონაწილეობით სამიტის მეორე დღის შედეგების შეჯამების შემდეგ განაცხადა.
BBC-ის ცნობით, მიუხედავად იმისა, რომ წელს უკრაინამ უკვე მიიღო 19 მილიარდი ევრო ევროკავშირისგან, ფონ დერ ლაიენმა, რომელიც ყვითელ-ლურჯ სამკერდე ნიშნით ლაპარაკობდა, ხაზგასმით აღნიშნა, რომ უკრაინისთვის ძალზე მნიშვნელოვანია, მომავალში თანხების სტაბილურად მიღება.
გარდა ამისა, ურსულა ფონ დერ ლაიენმა განაცხადა, რომ ევროკავშირი ეძებს გზებს, რათა დაეხმაროს უკრაინას წყლის, სითბოს და ელექტროენერგიის მიწოდების აღდგენაში. ხოლო სამიტის თავმჯდომარემ, შარლ მიშელმა, ევროპული საბჭოს ხელმძღვანელმა, ხაზგასმით აღნიშნა, რომ ევროკავშირი გეგმავს სანქციების გამო გაყინული რუსული აქტივების გამოყენებას უკრაინის აღსადგენად.
გამოცემის ცნობით, ევროკავშირის წევრებმა გაცილებით ნაკლები ერთსულოვნება გამოიჩინეს გაზის ფასის ზღვრის დადგენის საკითხში, რომელიც დიდი ხანია განიხილება, მაგრამ ევროკავშირი ჯერ კიდევ შორს არის საბოლოო გადაწყვეტილების მიღებისგან.