იუსტიციის უმაღლესმა საბჭომ დღევანდელ სხდომაზე რამდენიმე საკითხზე იმსჯელა, მათ შორის რაიონული სასამართლოების თავმჯდომარის დანიშვნაზე და კანდიდატებს მოუსმინა. სხდომას მოსამართლე წევრის სტატუსით ლევან მურუსიძე და დიმიტრი გვრიტიშვილიც ესწრებოდნენ. მედიასთან საუბრისას მათ განაცხადეს, რომ მათი მუშაობის მთავარი მიზანი ქვეყანაში მართლმსაჯულების გაძლიერება იქნება.
„მთავარი და ერთადერთი პრობლემა, რაც სასამართლოს აქვს, არის საქმეებით გადატვირთულობა. ეს ერთ-ორ დღეში ვერ გადაწყდება, მაგრამ უახლოეს დღეებში გადავდგამთ ნაბიჯებს, რომ ეს პრობლემა აღმოიფხვრას. გავაკეთებთ ისე, რომ ჩვენი მოქალაქეების წინაშე ვიყოთ პირნათელი და მოქალაქეებმა, რომლებიც მიმართავენ სასამართლოს, დროულად მიიღონ გადაწყვეტილება. რაც შეიძლება მეტი კვალიფიციური კადრი უნდა მოვიზიდოთ, მოსამართლის საქმიანობა უფრო მიმზიდველი უნდა გახდეს“, – განაცხადა ლევან მურუსიძემ.