ესპანეთის ქალაქ სევილიაში, საგადასახადო მიზნებისთვის გამჭვირვალობისა და ინფორმაციის გაცვლის გლობალური ფორუმის მე-15 პლენარული შეხვედრის ფარგლებში, საქართველოს ფინანსთა მინისტრი ლაშა ხუციშვილი ესპანეთის ფინანსთა მინისტრს, მარია ხესუს მონტეროს შეხვდა, – ამის შესახებ ინფორმაციას ფინანსთა სამინისტრო ავრცელებს.
მათივე ინფორმაციით, შეხვედრაზე საქართველოს ფინანსთა მინისტრმა კოლეგას რეგიონში არსებული გამოწვევების დაძლევის მიზნით საქართველოს მიერ გატარებული ღონისძიებები გააცნო. ფინანსთა მინისტრებმა ხაზი გაუსვეს ქვეყნებს შორის ფინანსური ანგარიშების შესახებ ინფორმაციის ავტომატური გაცვლის მნიშვნელობას, გადასახადების გადაუხდელობისა და გადასახადებისათვის თავის არიდების აღკვეთისათვის.
მხარეებმა განიხილეს ორ ქვეყანას შორის საგადასახადო სფეროში არსებული თანამშრომლობის საკითხები და გამოხატეს მზადყოფნა აღნიშნული თანამშრომლობის შემდგომი გაღრმავებისათვის.
შეხვედრას, ასევე, ესწრებოდნენ ესპანეთის სახელმწიფო მდივანი ხაზინის საკითხებში ხესუს გასკონ კატალანი, საქართველოს ფინანსთა მინისტრის მოადგილე მამუკა ბარათაშვილი, საგადასახადო და საბაჟო პოლიტიკის დეპარტამენტის ხელმძღვანელი მარინე ხურციძე და ესპანეთის სამეფოში საქართველოს საგანგებო და სრულუფლებიანი ელჩი ილია გიორგაძე.