ჰააგის საოლქო სასამართლომ 2014 წლის ივლისში დონეცკის ოლქში „მალაიზიური ავიახაზების კუთვნილი სამგზავრო ბოინგის კატასტროფის საქმეზე“ გადაწყვეტილება გამოაცხადა.
სასამართლომ დაადგინა, რომ MH17-ის რეისის თვითმფრინავი ქალაქ სნეჟნოესთან მდებარე პერვომაისკის რაიონიდან გაშვებული „ბუკის“ ტიპის რაკეტით ჩამოაგდეს.
აღნიშნული ტერიტორია თვიმფრინავის ჩამოგდების დროს თვითგამოცხადებული „დონეცკის სახალხო რესპუბლიკის“ ძალების კონტროლის ქვეშ იმყოფებოდა.
სასამართლო მიიჩნევს, რომ თვითმფრინავის ჩამოვარდნის მომენტში რუსეთი ახორციელებდა ეფექტურ კონტროლს სეპარატისტული დონეცკის სახალხო რესპუბლიკის ხელმძღვანელებსა და მომხრეებზე.
სასამართლო მიიჩნევს, რომ 2014 წლის მაისიდან რუსეთი უზრუნველყოფდა ე.წ. დონეცკის სახალხო რესპუბლიკის სამხედროების მომზადებას, იარაღის და სურსათის მიწოდებას, ასევე ახორციელებდა სეპარატისტების სამხედრო ქმედებების კოორდინაციას და თავად ატარებდა სამხედრო მოქმედებებს უკრაინის აღმოსავლეთ ნაწილში.
ამსტერდამიდან კუალა-ლუმპურში მიმავალი ავიალაინერი რეისით MH17, რომლის ბორტზეც 298 ადამიანი იმყოფებოდა, 2014 წლის 17 ივლისს ჩამოაგდეს. მგზავრთა შორის 80 ბავშვი იყო. ნიდერლანდების და ავსტრალიის მთავრობებმა დონეცკის ოლქში 2014 წელს მალაიზიური ავიახაზების კუთვნილი სამგზავრო თვითმფრინავის ჩამოგდებაზე პასუხისმგებლობა რუსეთს ოფიციალურად დააკისრეს.