სტრასბურგში ევროპის საბჭოს მინისტრთა კომიტეტის სხდომაზე საქართველოს ელჩმა, მუდმივმა წარმომადგენელმა, თამარ ტალიაშვილმა ეუთო-ს გენერალურ მდივან ჰელგა შმიდს სიტყვით მიმართა.
ინფორმაციას ორგანიზაცია “საქართველო ევროპის საბჭოში” ავრცელებს.
მათი ცნობით, თამარ ტალიაშვილი მიესალმა ეუთო-ს გენერალური მდივნის მიერ მიმდინარე წელს გადადგმულ აქტიურ ნაბიჯებს და ყურადღება გაამახვილა საქართველოს ოკუპირებულ რეგიონებში არსებულ ვითარებაზე.
ტალიაშვილის თქმით, ოკუპირებულ რეგიონებში ადამიანის უფლებების უმძიმეს დარღვევებზე რუსეთის პასუხისმგებლობას ადასტურებს ევროპის საბჭოს ადამიანის უფლებების საერთაშორისო სასამართლოს მიერ საქართველოს სასარგებლოდ გამოტანილი გადაწყვეტილებები.
“თამარ ტალიაშვილმა ხაზი გაუსვა საქართველოს ხელისუფლების მიერ დეოკუპაციის მიღწევის მიზნით წარმოებულ სამშვიდობო პოლიტიკას.
საქართველოს ელჩმა ისაუბრა ჟენევის საერთაშორისო დისკუსიების ფორმატის განსაკუთრებულ როლზე, რათა რუსეთმა შეასრულოს 12 აგვისტოს ცეცხლის შეწყვეტის შეთანხმებით ნაკისრი ვალდებულებები. მან გამოსვლაში ასევე ხაზი გაუსვა ინციდენტების პრევენციისა და მათზე რეაგირების მექანიზმების სრულყოფილი ფუნქციონირების აუცილებლობას.
თამარ ტალიაშვილმა ევროპაში არსებული უსაფრთხოების კრიზისის ფონზე ევროპის საბჭოს, ეუთო-სა და საერთაშორისო ორგანიზაციების გაძლიერების მნიშვნელობაზეც ისაუბრა”, – აღნიშნულია ინფორმაციაში.