მიმაჩნია, რომ „ნაციონალური მოძრაობის“ სამი წევრის შიმშილობა არის სააკაშვილის ბიძის, ალასანიას დირექტივა ან მისი მკაცრი დირექტივის კომპენსირება, რომელიც ალბათ მათი მხრიდან მანდატების დატოვებასთან იყო დაკავშირებული, – ამის შესახებ საქართველოს პარლამენტის დიასპორისა და კავკასიის საკითხთა კომიტეტის თავმჯდომარე ბექა ოდიშარიამ განაცხადა.
ბექა ოდიშარია გამოეხმაურა იმ ფაქტს, რომ „ნაციონალური მოძრაობის“ დეპუტატები, დავით კირკიტაძე, ანა წითლიძე და აბდულა ისმაილოვი შიმშილობას აცხადებენ.
ოდიშარიას თქმით, სჯობს, „ნაციონალური მოძრაობის“ წევრებმა აქცენტები გადაიტანონ იმ პროცესებზე, რაც პარტიაში მიმდინარეობს.
„როგორც ჩანს, ოპოზიციონერი კოლეგები აპირებდნენ შიმშილობის აქციის წამოწყებას. გვახსოვს, წინა შემთხვევაში ეს აქცია ხანმოკლე იყო, დაახლოებით იგივე მოთხოვნით. მიმაჩნია, რომ „ნაციონალური მოძრაობის“ სამი წევრის შიმშილობა არის სააკაშვილის ბიძის, ალასანიას დირექტივა ან მისი მკაცრი დირექტივის კომპესირება, რომელიც ალბათ მათი მხრიდან მანდატების დატოვებასთან იყო დაკავშირებული. დღეს მათ პარტიაში უმძიმესი მდგომარეობაა. კრილოვის იგავივითაა, ერთი ალთას მიექაჩება, მეორე – ბალთას. ძალ-ღონე შეინახონ, ამხელა პრაიმერიზი აქვთ გადასალახი. 29 იანვრამდე ხომ უნდა მიიტანონ სული და შეინახონ ძალები. მით უმეტეს მოშიმშილეებს შორისაც სხვადასხვა კანდიდატის მხარდამჭერები არიან. სჯობს, აქცენტები გადაიტანონ პროცესებზე, რაც პარტიაში მიმდინარეობს“, – განაცხადა ბექა ოდიშარიამ.