სამბისტი ელენე ქებაძე, რომელიც მსოფლიოს ჩემპიონი უკვე ორჯერ გახდა, საქართველოს კულტურის, სპორტისა და ახალგაზრდობის სამინისტროს აკრიტიკებს. როგორც ის სოციალურ ქსელში წერს, სამინისტროს “ფეისბუქის” ოფიციალურ გევრდზე მის გამარჯვებასთან დაკავშირებით გამოქვეყნებული მისალოცი პოსტი მოგვიანებით წაიშალა.
“სამწუხაროა, როდესაც მსოფლიო ჩემპიონი ხდები უკვე მეორედ და სპორტის სამინისტროდან აეროპორტშიც კი არავინ გხვდება, აღარაფერს ვამბობ პირადად შეხვედრაზე, მით უმეტეს მაშინ, როდესაც სპორტის მინისტრი ქალბატონია. კარგი, ალბათ არ სცალიათ, ყველაფერი გასაგებია. შესაძლებელია, რომ ყველაფერს თავისი ახსნა მოვუძებნოთ, მაგრამ იმ ფაქტზე რას იტყვით, როდესაც სპორტის სამინისტრო მოგილოცავს “ფეისბუქზე” და დღეს ვნახულობთ, რომ ეს პოსტი წაშლილია?! ძალიან სამარცხვინოა, რომ მილოცვა უკან წაიღეს.
არაუშავს, მე ვაგრძლებ ვარჯიშს და ყველაფერს გავაკეთებ იმისთვის, რომ ჩემი გულშემატკივარი და სრულიად საქართველო კიდევ ბევრჯერ გავახარო და ვასახელო!” – წერს სოციალურ ქსელში სპორტსმენი.
