ქალის მიმართ ძალადობასა და მუქარაში ბრალდებული მომღერალი არჩილ მეფარიძე 12 იანვარს დანიშნულ წინასასამართლო სხდომაზე არ გამოცხადდა. ნოტარიუსის მიერ დამოწმებული წერილი, სადაც მან სასამართლოში არ გამოცხადების მიზეზი ახსნა, ადვოკატს გამოატანა.
ადვოკატმა, ლევან ზაქრაძემ თბილისის საქალაქო სასამართლოს მოსამართლეს, ლევან გელოვანსა და პროკურორს, თამარ ყულჯანიშვილს, მომღერლის წერილის შინაარსი ხმამაღლა გააცნო:
„ჯანმრთელობის მდგომარეობის გამო ვერ ახერხებს წინასასამართლო სხდომაზე გამოცხადებას და პროცესში მონაწილეობის მიღებას. ითხოვს წინასასამართლო სხდომა ჩატარდეს მისი მონაწილეობის გარეშე, მისი ინტერესების დამცველი ადვოკატის, ანუ, ჩემი მონაწილეობით, რომელსაც უცხადებს სრულ ნდობას“.
პროკურორმა არჩილ მეფარიძის ჯანმთელობის მდგომარეობის დამადასტურებელი ცნობის წარდგენა სთხოვა ადვოკატს, თუმცა ადვოკატმა თქვა:
„ეს ცნობა რომ მქონოდა, წარმოვადგენდი. მე არ გახლავართ ექიმი. ვიცი, რომ ვერ შეძლო მან დღევანდელ სასამართლო სხდომაზე გამოცხადება და ითხოვს სასამართლო სხდომის მის გარეშე ჩატარებას, რაც მისი უფლება და მისი გადაწყვეტილებაა“.
მომღერალ არჩილ მეფარიძეს ბრალდება 2022 წლის 7 აპრილს, ლელა ჯუღელის მიმართ განხორციელებულ ფიზიკურ ძალადობასა და სიცოცხლის მოსპობის მუქარას ედავება.
პროკურატურის თანახმად, არჩილ მეფარიძეს სისხლის სამართლის კოდექსის 126-ე მუხლის პირველი ნაწილით (ფიზიკური ძალადობა) ბრალი 28 აპრილს წარედგინა. 29 დეკემბერს კი ბრალს კიდევ ერთი, 151-ე მუხლი დაემატა, რაც სიცოცხლის მოსპობის მუქარას გულისხმობს. ბრალის დამტკიცების შემთხვევაში, მას მას ჯარიმა, შინაპატიმრობა, საზოგადოებისათვის სასარგებლო შრომა ან ერთ წლამდე თავისუფლების აღკვეთა ემუქრება.
მიუხედავად იმისა, რომ საქმეში დევს არჩილ მეფარიძის 28 აპრილის ჩვენება, სადაც ის ამბობს, რომ მისთვის სრულიად გასაგებია ბრალდების არსი, „რაშიც თავს მთლიანად დამნაშავედ ცნობს“, დღეს მისი ადვოკატი აცხადებს, რომ მისი დაცვის ქვეშ მყოფი პირი ბრალის არცერთ ნაწილ ნაწილში არაა დამნაშავე და შესაბამისად, არჩილ მეფარიძე თავს უდანაშაულოდ მიიჩნევს:
ლელა ჯუღელი მოითხოვს, რომ არჩილ მეფარიძე კანონის სრული სიმკაცრით დაისაჯოს:
„მოძალადე სამაგალითოდ უნდა დაისაჯოს, რომ ეს იყოს მაგალითი საზოგადოებისთვის. ჩემთვის არ აქვს მნიშვნელობა, ის გამოჩენილი ვარსკვლავია, მოცეკვავეა, მომღერალი, ექიმი თუ პრეზიდენტი. ის უნდა დაისაჯოს უმკაცრესად. ეს არის ჩემი მოთხოვნა და ბოლომდე ვიბრძოლებ ამ საქმისთვის“.
როგორც ლელა ჯუღელი ირწმუნება, ფიზიკური ძალადობის მეორე დღეს, 8 აპრილს, არჩილ მეფარიძემ შუამავლის მეშვეობით მისი „მოსყიდვა“ და ამით დანაშაულის დაფარვა სცადა:
„სატელეფონო ზარი განხორციელდა ე.წ. შუამავლის საშუალებით. ჩემთვის ეს იყო მეასეხარისხოვანი შემოთავაზება და მახსოვს, როგორ გაიელვა ლაპარაკში რაღაც წყნეთის მიწის ნაკვეთმა, თუმცა, შემდეგ მე აღარ მომისმენია, რას გვთავაზობდნენ“.
წყარო: რადიო თავისუფლება