სააკაშვილის ნათქვამს მთელი საქართველო უფრო სერიოზულად ვეპყრობით, ვიდრე ღირსია ეს ნათქვამი, – ამის შესახებ პოლიტოლოგმა რამაზ საყვარელიძემ საქართველოს პირველი არხის გადაცემაში „აქტუალური შაბათი – მაკა ცინცაძესთან ერთად“ სტუმრობისას განაცხადა.
საყვარელიძემ უპასუხა წამყვანის შეკითხვას, შესაძლებელია თუ არა, მიხეილ სააკაშვილის „შპიგელთან“ ინტერვიუ აღვიქვათ ნიკა მელიას ირიბ მხარდაჭერად, რადგან საკუთარი გუნდიდან მან მხოლოდ მერაბიშვილი ახსენა და თქვა, რომ გირგვლიანის საქმის შემდეგ მის თანამდებობაზე დატოვებას ნანობს, ამ დრომდე კი არჩევნებთან დაკავშირებით არაფერი უთქვამს და არც რომელიმე გუნდისთვის გამოუხატავს მხარდაჭერა.
„მე არ მჯეროდა, რომ ამ ორი კანდიდატიდან, მელიადან და ხაბეიშვილიდან რომელიმეს აირჩევდა. ვვარაუდობდი, რომ მამულაშვილისკენ წავიდოდა მისი ყურადღება, რადგან, ჯერ ერთი, იქ შეიარაღებული ძალაა და მას უყვარს იარაღი. მეორეც, ამ ორ კანდიდატში მას უკვე იმედგაცრუება აქვს. ჩვენ გვახსოვს, რომ მელია თავმჯდომარის პოსტზე ისე გავიდა, მიშა ამის მომხრე არ იყო. ის, ფაქტობრივად, ფაქტის წინაშე დააყენეს და ახლა კეზერაშვილის გუნდის მიმართაც მკაფიოდ გამოხატა ეს. მას თვითონ არ აქვს რაღაცები ჩამოყალიბებული და მგონია, მთელი საქართველო მის ნათქვამს უფრო სერიოზულად ვეპყრობით, ვიდრე ღირსია ეს ნათქვამი. დააკვირდით, კაცმა ისაყვედურა, ჩემი კადრები რატომ გამოაქვეყნეთ და ჭკუასუსტად რატომ გამომიყვანეთო, ამ დროს კი მთელი მისი პარტია და საახლობლო იძახის, დემენცია აქვსო. დემენცია და ჭკუასუსტობა ხომ ერთი და იგივეა და თუ იმაზე თანახმა ხარ, დემენცია მოგაწებონ, ამაზე რატომ აცხადებ, ჭკუასუსტად არ გამომიყვანოთო? ეს დემენციის ბრალი არის თუ არა, არ ვიცი, მაგრამ, ყოველ შემთხვევაში, ურთიერთსაწინააღმდეგო რაღაცებს იძახის. ამიტომ მისი ნათქვამისთვის დიდი მნიშვნელობის მიცემა არ ღირს“, – განაცხადა საყვარელიძემ.
მისი თქმით, მიხეილ სააკაშვილს ხელის შეწმენდის პოლიტიკა ყოველთვის ჰქონდა.