ზუგდიდში „საქართველოს ბანკზე“ თავდამსხმელი ბადრი ესებუას მამა, ტარიელ ესებუა ამბობს, რომ 2020 წლის ოქტომბრიდან ძებნილი შვილის შესახებ აქამდე არაფერი სმენია და მისი დაკავების თაობაზეც ტელევიზიით გაიგო.
„დაკავებულია, თქვენ ძალიან კარგად იცით. სად დააკავეს, ისიც იცით. მეტი მე არაფერი ვიცი. ტელევიზიით რაც გავიგე, თქვენც გეცოდინებათ ალბათ“, – აცხადებს დაკავებულის მამა.
კითხვაზე, იცნობს თუ არა ომიანე ჯიქიას, რომლის სახლშიც აიყვანეს ბადრი ესებუა, ტარიელ ესებუა ამბობს, რომ ომიანე თავისი ბიძაა. „ჩემი მეუღლის ბიძაა ომიანე ჯიქია, რა თქმა უნდა ნათესავები ვართ. ჩემს ცხოვრებაში ერთხელ ვიყავი მის სახლში, სატირალში. რაც მოხდა, იმის მერე ჩემი შვილი არ უნახავს, კონტაქტი არ ჰქონია“, – აცხადებს ტარიელ ესებუა.
„საქართველოს ბანკის“ ზუგდიდის ფილიალზე თავდასხმაში და მძევლების აყვანაში ბრალდებული ბადრი ესებუა სოფელ ჯიხაშკარში დააკავეს.
ბადრი ესებუა „საქართველოს ბანკის“ ზუგდიდის ფილიალში 2020 წლის 21 ოქტომბერს, დღის პირველ ნახევარში შეიჭრა. ის, ნახევარ მილიონ დოლართან ერთად, ვერტმფრენს ან მანქანას ითხოვდა, რათა მძევლებთან ერთად ტერიტორიის უსაფრთხოდ დატოვების გარანტია ჰქონოდა. ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცველებმა შენობიდან გამოიყვანეს. დილის ხუთი საათისთვის ცნობილი გახდა, რომ ბადრი ესებუამ სამივე მძევალი გაათავისუფლა და თავად გაიქცა.
გამოძიება მის წინააღმდეგ საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.