თბილისის საქალაქო სასამართლოში, საზოგადოებრივ ტრანსპორტში ცოლის მკვლელობის საქმის განხილვა დასრულდა. მომდევნო სხდომაზე ბრალდებული საბოლოო სიტყვით ისარგებლებს და განაჩენი გამოცხადდება.
სხდომის დაწყებამდე სიტყვიერი შელაპარაკება მოხდა ბრალდებულის დედასა და გარდაცვლილის დედას შორის.
“როინ მებონია ვერ აცნობიერებდა რას აკეთებდა, ანუ ის შერაცხადი არ არის ამ საქმეზე და მისი სისხლის სამართლებრივი წესით გასამართლება არ შეიძლებოდა. მას აქვს მძიმე ავადმყოფობის ისტორია, მათ შორის ამ ქმედების განხორციელებამდე მე-5 სართულიდან არის ადამიანი გადმომხტარი ბოდვითი აშლილობების და მოლანდებების გამო. როინ მებონია სასჯელაღსრულების დაწესებულებაში კი არ უნდა მიდიოდეს სასამართლო დარბაზიდან, სამკურნალოდ უნდა მიდიოდეს,” – აცხადებს ადვოკატი სულხან კომახიძე.
პროკურორის განცხადებით, დასკვნით დადგინდა, რომ დანაშაულის ჩადენის დროს ბრალდებული შეზღუდული შერაცხადობის მდგომარეობაში იმყოფებოდა, რაც მის სისხლის სამართლებრივ პასუხისმგებლობას არ გამორიცხავს.
“მიღებულ იქნა შესაბამისი დასკვნა, რომლითაც დადგინდა, რომ უშუალოდ დანაშაულის ჩადენის დროს ბრალდებული იმყოფებოდა შეზღუდული შერაცხადობის მდგომარეობაში, რაც არ გამორიცხავს მის სისხლის სამართლებრივ პასუხისმგებლობას. გარდაცვლილს მიყენებული აქვს 27 ჭრილობა. ბრალდებულის მიმართ უმკაცრესი სასჯელი უნდა იქნეს გამოყენებული და მოვითხოვეთ სასამართლოს წინაშე უმკაცრესი სასჯელი უვადო თავისუფლების აღკვეთის სახით,” – განაცხადა პროკურორმა ლევან ჟორჟოლაძემ.
თბილისში კაცმა ცოლი 2022 წლის მაისში ავტობუსში მოკლა. შემთხვევა გურამიშვილის გამზირზე მოხდა. კაცმა ცოლს ყელი არასრულწლოვანი შვილების თანდასწრებით გამოჭრა. ბრალდებულმა დანა გარდაცვლილს 27-ჯერ ჩაარტყა.