“სამწუხაროდ ზუსტი სტატისტიკა არ არსებობს, მაგრამ შეგვიძლია ვთქვათ, რომ თბილისში დაახლოებით 10 000-მდე ავარიული ნაგებობა არსებობს”

ათწლეულების განმავლობაში დედაქალაქში უდიდეს პრობლემას წარმოადგენდა ავარიული სახლები. ყოველთვის იყო საუბარი მათ ჩანაცვლებაზე, თუმცა არც ერთი კონკრეტული ნაბიჯი შეიძლება ითქვას, არ გადადგმულა ამ მიმართულებით, – ამის შესახებ თბილისის საკრებულოს ურბანული დაგეგმარებისა და საქალაქო მეურნეობის კომისიის თავმჯდომარემ, რევაზ სოხაძემ „ქრონიკაში“ განაცხადა.

„კახა კალაძის წინასაარჩევნო დაპირებას წარმოადგენდა, რომ ის აუცილებლად დაიწყებდა ამ პრობლემის მოგვარებას და რეალური ნაბიჯების გადადგმას. მუნიციპალიტეტი საკმაოდ დიდი ხნის განმავლობაში მუშაობდა ამ წესის შემუშავებაზე. ძალიან მნიშვნელოვანი იყო იმ კრიტერიუმების შექმნა და შემუშავება, რის მიხედვითაც განხორციელდებოდა ავარიული კორპუსების ჩანაცვლება და ეს დადგენილება ჩვენ მივიღეთ მაისის თვეში. უკვე განისაზღვრა კონკრეტული წესი, მაგრამ მოსახლეობას კარგად უნდა ესმოდეს, რომ ეს ძალიან რთული პროცესია. უამრავ ადამიანთან გვიწევს ურთიერთობა. თბილისში რაც შეეხება ავარიული სახლების რაოდენობას, სამწუხაროდ ზუსტი სტატისტიკა არ არსებობს, მაგრამ შეგვიძლია ვთქვათ, რომ დაახლოებით 10 000-მდე ასეთი ნაგებობა არსებობს“- განაცხადა სოხაძემ.