მინერალური წყლის კომპანია “საირმის” (შპს “საირმე მინერალ ვოთერსის”) თანამშრომლები გაიფიცნენ. თანამშრომლები ითხოვენ ღირსეულ სამუშაო პირობებს, მათ შორის ხელფასების გაზრდას. თანამშრომლები კომპანიის შესასვლელთან გურიაში, კურორტ “საირმეში” არიან შეკრებილი. გაფიცვა დღეს, 13 თებერვალს, დილის 09:00 საათზე დაიწყო.
თანამშრომლების მოთხოვნებია:
ხელფასების 30 პროცენტით ზრდა;
საქსტატის მონაცემების გათვალისწინებით ხელფასების ყოველწლიური ინდექსაცია;
დამსაქმებელმა დაფაროს საპენსიო გადასახადი;
უსაფრთხო სამუშაო პირობების შექმნა;
ანტისანიტარიის მოწესრიგება;
კოლექტიური შეთანხმება.
გაფიცულ თანამშრომლებს უფლებების დაცვაში აგრო მეურნეობის, ვაჭრობისა და მრეწველობის პროფკავშირი “ლაბორ” ეხმარება. ორგანიზაციის ხელმძღვანელმა, გიორგი დიასამიძემ რადიო თავისუფლებას უთხრა, რომ ამ მონაცემებით ყველა დასაქმებული გაფიცულია.
“30 დასაქმებულიდან 30 ადამიანია გაფიცული. ქარხანა პარალიზებულია. დამსაქმებელმა გუშინ ღამით შეიყვანა ადამიანები ქარხნის ასამუშავებლად, თუმცა მათ არ იციან, რა ხდება. მაინც ვერ აამუშავებენ. გაფიცვა უვადოა და გაგრძელდება იქამდე, სანამ არ დაკმაყოფილდება მოთხოვნები”, – ამბობს გიორგი დიასამიძე.