უკრაინაში მიმდინარე ომში რუსეთის მხარეს მოხალისედ მებრძოლი 49 წლის რამინ ბახტაძე დაიღუპა.
რამინ ბახტაძის მამამ არნოლდ ბახტაძემ „გალი ტვ“-ს უამბო. რამინ ბახტაძე ოკუპირებული აფხაზეთიდან, კერძოდ გალის სოფელ პირველი ოტობაიადან იყო.
მამა ამბობს, რომ მისის შვილი რუსეთის ქალაქ ვლადიმირში ცხოვრობდა. გასული წლის 15 დეკემბერს მეგობრებთან ერთად ჩეჩნეთში წავიდა, საიდანაც უკრაინაში გაემგზავრა. იგი ომში რუსეთის მხარეს საბრძოლველად მეგობრებთან ერთად წავიდა და 31 დეკემბერს, უკრაინელების მიერ ქალაქ მაკიივკაზე მიტანილი იერიშისას დაიღუპა.
მამა ამბობს, რომ „მის შვილს შეეძლო სულ სხვა არჩევანი გაეკეთებინა“.
მამის სიტყვებით, რამინ ბახტაძის ცხედარი თუთიის კუბოთი ჩამოასვენეს. შვილის ამოცნობა მამამ სვირინგის მეშვეობით შეძლო. ბახტაძე ვლადიმირში დედის გვერდით დაკრძალეს.
მას ორი ქალიშვილი და სამი შვილიშვილი დარჩა.
შეგახსენებთ, რომ ოკუპირებულ მაკიივკაზე, კიევმა სარაკეტო თავდასხმა ახალი წლის ღამეს განახორციელა. უკრაინული მხარის ინფორმაციით, ახალი წლის ღამეს მაკიივკაში 400-მდე მობილიზებული რუსი დაიღუპა, ხოლო დაიჭრა 300.