სინოდის დღევანდელმა სხდომამ მშვიდობიანად ჩაიარა, – ამის შესახებ ახალქალაქისა და კუმურდოს მიტროპოლიტმა, ნიკოლოზ ფაჩუაშვილმა საქართველოს მართლმადიდებელი ეკლესიის წმინდა სინოდის სხდომის შემდეგ ჟურნალისტებს განუცხადა. მისი თქმით, სხდომა ძალიან მოკლე იყო და მასზე სამი საკითხი განიხილეს.
„პირველი, რაც შემიძლია, გითხრათ, იყოს ის, რომ მივულოცეთ პატრიარქს დაბადებიდან 90 და პატრიარქობის 45 წლის იუბილე. ერთ-ერთი საკითხი იყო, რომ სამძიმრის წერილს გავუგზავნით თურქეთის სახელმწიფოს, მაგრამ, პირველ რიგში, კონსტანტინოპოლის პატრიარქს და ანტიოქიის პატრიარქს სირიაში, სადაც მოხდა ეს საშინელი ტრაგედია. დანარჩენი, ძალიან ყოფითი საკითხები იყო“, – განაცხადა მეუფემ.
ჟურნალისტების კითხვას „იყო თუ არა საუბარი პატრიარქის უფლებამოსილების გადაბარებაზე, ტახტის მემკვიდრეზე?“ მეუფემ ასე უპასუხა – „ამას ვერავინ მოესწრება“.
„თქვენ მაიძულებთ, ცუდი რაღაც ვთქვა. ახლა ვიტყვი, ვერ მოესწრება ამას ვერავინ, ვერასოდეს. არასოდეს დადგება ეს საკითხი დღის წესრიგში და აზრადაც არ მოსვლია ვინმეს, რაღაც მსგავსი ეთქვა. ვერ მოესწრება ვერავინ. პატრიარქი იქნება დიდხანს და პატრიარქობის 50 წლის იუბილეს ერთად აღვნიშნავთ. დაიმახსოვრეთ ჩემი სიტყვები“, – განაცხადა მეუფე ნიკოლოზმა.