უკრაინის შეიარაღებული ძალების გენერალური შტაბის მონაცემებით, გასულ 24 საათში, რუსეთის საოკუპაციო ძალებმა უკრაინის ტერიტორიაზე განახორციელეს 5 სარაკეტო და 50 საავიაციო დარტყმა და 59 შეტევა ზალპური ცეცხლის რეაქტიული სისტემების გამოყენებით. გენშტაბის ცნობით, თავდაცვის ძალებმა ჩამოაგდეს მოწინააღმდეგის მიერ გამოყენებული 11 უპილოტო საფრენი აპარატიდან 9.
გარდა ამისა, რუსულმა ქვედანაყოფებმა ნაღმმტყორცნებითა და საარტილერიო დანადგარებით დაცხრილეს დონეცკის, ჩერნიგოვის, სუმის, ხარკოვის, ზაპოროჟიეს, დნეპროპეტროვსკის და ხერსონის ოლქების ათეულობით დასახლებული პუნქტი.
უკრაინის არმიის სარდლობის განცხადებით, რუსეთს ძირითადი ძალისხმევა ისევ კონცენტრირებული აქვს შეტევებზე ლიმანის, ბახმუტის, კუპიანსკის, ავდეევკის და შახტარსკის მიმართულებებით, სადაც გასულ 24 საათში თავდაცვის ძალებმა მოიგერიეს 140-ზე მეტი შეტევა, მათ შორის 37 ქალაქ ბახმუტთან მდებარე მხოლოდ ერთ სოფელთან, დუბოვო-ვასილევკასთან.