რუსეთის საგარეო საქმეთა მინისტრი, სერგეი ლავროვი შესაძლოა, აშშ-ში არ შეუშვან.
კერძოდ, როგორც გაეროში რუსეთის მუდმივი წარმომადგენლის პირველმა მოადგილემ, დიმიტრი პოლიანსკიმ განაცხადა, არსებობს რისკი, რომ ლავროვზე ვიზა არ გაიცეს.
რუსეთის დიპლომატიის ხელმძღვანელმა 24 და 25 აპრილს გაეროს უშიშროების საბჭოს უნდა უხელმძღვანელოს, ასევე, მუშავდება მისი შეხვედრა ორგანიზაციის გენერალურ მდივანთან, ანტონიო გუტიერეშთან.
თუმცა, პოლიანსკის თქმით, არც ლავროვს და არც მის დელეგაციას აშშ-ის ვიზა ჯერ არ აქვს.
“ფრენის ნებართვის გაცემა მოგზაურობის დროსთან ახლოს ხდება. მაგრამ ძნელად წარმომიდგენია, რომ შეერთებული შტატები ამაზე წავიდეს იმ რეზონანსის გათვალისწინებით, რაც ამ ნაბიჯს მოჰყვება”, – თქვა მან.
როგორც პოლიანსკიმ აღნიშნა, თუ შეერთებული შტატები ამას მაინც გააკეთებს, მას მოკავშირეების მხრიდანაც კი უკიდურესად მკაცრი კრიტიკა ელოდება.