უკრაინის პრეზიდენტმა, ვოლოდიმირ ზელენსკიმ რუსეთის მიერ ჩადენილი დანაშაულებისთვის სრულფასოვანი საერთაშორისო ტრიბუნალის შექმნისკენ მოუწოდა და გააკრიტიკა ერთ-ერთი შეთავაზებული ფორმატი – “ჰიბრიდული” ტრიბუნალი.
ამის შესახებ მან ჰააგაში, სისხლის სამართლის საერთაშორისო სასამართლოში გამოსვლის დროს თქვა.
„აგრესიული ომის დაწყება არის დანაშაული, რომელიც განსხვავდება სხვა დანაშაულებისგან იმით, რომ ის შეიცავს სხვა დანაშაულების ყველა ბოროტებას. ჩვენ უნდა გარდავქმნათ ნიურნბერგის სასამართლო პროცესის გამოცდილება. ამიტომ, ჩვენ მხარს ვუჭერთ ასეთი ტრიბუნალის შექმნას. ჩვენ გვინდა, გავაგრძელოთ აგრესიის დანაშაულის დასჯის ტრადიცია – როგორც გარანტია, რომ ის არ განმეორდება. თუ ჩვენ გვინდა სამართლიანობა, არ უნდა ვეძებოთ საბაბები და მოვიშველიოთ არსებული საერთაშორისო სამართლის ნაკლოვანებები. ამის ნაცვლად, უნდა მივიღოთ თამამი გადაწყვეტილებები, რომლებიც ამ ხარვეზებს გამოასწორებს. სწორედ ამას აკეთებდნენ ნიურნბერგის პროცესის ინიციატორები, სწორედ ეს უნდა გავაკეთოთ ჩვენ ახლა. არ უნდა შეგვეშინდეს – აგრესორმა იმ პასუხისმგებლობის სისრულე უნდა იგრძნოს, რომელიც მის წინააღმდეგ იქნება მიმართული. ეს არის ჩვენი ისტორიული პასუხისმგებლობა”, – თქვა მან.
ზელენსკიმ ხაზგასმით აღნიშნა, რომ ელოდება რუსეთის უმაღლესი ხელმძღვანელობის სრულფასოვან ტრიბუნალს და „ჰიბრიდული“ ტრიბუნალის იდეა გააკრიტიკა.