აშშ-ის პრეზიდენტი ჯო ბაიდენი აცხადებს, რომ მისი შვილს, ჰანთერ ბაიდენს არაფერი დაუშავებია. ეს განცხადება აშშ-ის პრეზიდენტმა „ენბისისთან“ ინტერვიუში გააკეთა.
ჟურნალისტმა ბაიდენს ჰკითხა, რა გავლენას მოახდენს მის პრეზიდენტობაზე, თუ მის შვილს ბრალს წაუყენებენ.
„უპირველეს ყოვლისა, ჩემს შვილს არაფერი დაუშავებია. მე მას ვენდობი, მისი მჯერა“, – განაცხადა ბაიდენმა ჟურნალისტის კითხვაზე საპასუხოდ.
აშშ-ის ფედერალური პროკურატურა განიხილავს ჯო ბაიდენის შვილის მიმართ ბრალის წაყენებას გადასახადების დამალვასა და ცეცხლსასროლ იარაღთან დაკავშირებულ დარღვევებზე. თავად ჰანთერ ბაიდენი დანაშაულს უარყოფს.
აშშ-ის შემოსავლების სამსახურის თანამშრომელი აცხადებს, რომ ჰანთერ ბაიდენის წინააღმდეგ გამოძიება არასათანადოდ ჩატარდა. საქმე ეხება აშშ-ის პრეზიდენტის შვილის მიერ საკუთარი ბიზნესის წინ წასაწევად ოჯახური კავშირების არასათანადო გამოყენების გარშემო მიმდინარე გამოძიებას. როგორც აშშ-ის შემოსავლების სამსახურის თანამშრომლის ადვოკატი აცხადებს, მის კლიენტს აქვს ინფორმაცია, რომ ჰანთერ ბაიდენის წინააღმდეგ გამოძიება „პოლიტიკური მოსაზრებებით“ შეფერხდა. იურისტის თქმით, ის მზადაა, კონგრესს ჩვენება მისცეს, თუმცა მოწმეთა დაცვის პროგრამაში ჩართვასა და უსაფრთხოების გარანტიებს ითხოვს.