უკრაინა მოლდოვიდან სასოფლო-სამეურნეო პროდუქციის იმპორტს აკრძალავს. კიევში ეს გადაწყვეტილება მას შემდეგ მიიღეს, რაც კიშინიოვში განაცხადეს, რომ უერთდებიან ევროკავშირის მიერ უკრაინული პროდუქტების იმპორტზე დაწესებულ შეზღუდვას.
კერძოდ, მოლდოვა დროებით შეაჩერებს უკრაინიდან ხორბლის, სიმინდის, რაფსის და მზესუმზირის იმპორტს. კიშინიოვში განაცხადეს, რომ ქვეყანაში არსებული მარცვლეულის საცავები გადავსებულია და ადგილობრივი ფერმერები შიშობენ, რომ შესაძლოა, მათ ახალი მოსავლის შესანახი ადგილი აღარ დარჩეთ.
უკრაინის ეკონომიკის განვითარების სამინისტროში მოლდოვას გადაწყვეტილებას არამეგობრული ნაბიჯი უწოდეს და განაცხადეს, რომ საპასუხოდ სრულად აკრძალავენ მოლდოვიდან იმპორტს.
შეგახსენებთ, მანამდე ევროკომისიამ უკრაინული პროდუქციის ნაწილის იმპორტი ევროკავშირის 5 ქვეყანაში დროებით აკრძალა. ეს შეზღუდვა 5 ივნისამდე მოქმედებს.