საქართველოსთან ფრენების აკრძალვის მოხსნისკენ აშშ-ს და ევროკავშირის წარმომადგენლები რუსეთს 2019 წელს მოუწოდებდნენ. კერძოდ, 2019 წლის ივლისში საქართველოში აშშ-ის ელჩის მოვალეობის შემსრულებლის ელიზაბეთ რუდი ამბობდა:
„რუსეთის ფედერაციის მიერ ფრენების შეჩერების ზომები არაპროპორციული პასუხი იყო და ახლა, როდესაც საქართველოსა და რუსეთის ლიდერებმა გამოთქვეს მზადყოფნა ურთიერთობების სტაბილიზაციისთვის, ჩვენ მოვუწოდებთ რუსეთს გააუქმოს ფრენების აკრძალვა, მისცეს თავის მოქალაქეებს საქართველოში ჩამოსვლის საშუალება და აღდგეს ადამიანებს შორის კონტაქტი“, – აცხადებდა დიპლომატი.
ის ასევე აღნიშნავდა, რომ „ეკონომიკური და სავაჭრო ურთიერთობები როგორც ქართველი, ასევე რუსი ხალხის ინტერესებში შედის“.
ფრენების აკრძალვას გაუმართლებელ და არაპროპორციულ ნაბიჯად მიიჩნევდა ევროკავშირის საგარეო საქმეთა და უსაფრთხოების პოლიტიკის საკითხებში პრესსპიკერი მაია კოციანჩიჩი.
„რუსეთსა და საქართველოს ურთიერთობებში ბოლო დროს განვითარებული მოვლენები ორივე ქვეყნის მოქალაქეზე უარყოფითად აისახება. საქართველოში ფრენების აკრძალვის შესახებ რუსეთის გადაწყვეტილებას გაუმართლებელ და არაპროპორციულ ნაბიჯად ვთვლით“, – განაცხადა კოციანჩიჩმა 2019 წლის ივლისში.