იუსტიციის მინისტრის, რატი ბრეგაძისა და საქართველოში აკრედიტებული ელჩების შეხვედრა დასრულდა. იუსტიციის სამინისტროში გამართულ შეხვედრაზე მსჯავრდებული ექსპრეზიდენტის, მიხეილ სააკაშვილის სარჩელზე სტრასბურგის სასამართლოს მიერ გამოტანილი გადაწყვეტილება იყო.
შეხვედრას 22 საელჩოს წარმომადგენელი, მათ შორის 5 ელჩი ესწრებოდა.
„შეხვედრა დიპკორუპთან ჩვენი ინიციატივით გაიმართა და შეეხებოდა მსჯავრდებულ სააკაშვილთან დაკავშირებულ სიტუაციას. ბუნებრივია, ვისაუბრეთ მათ შორის სტრასბურგის სასამართლოს მიერ გამოტანილ გადაწყვეტილებაზეც და მიმოვიხილეთ სხვადასხვა საკითხიც, რომელზეც გასაგები მიზეზების გამო საჯაროდ მოვერიდები საუბარს. სტრასბურგის სასამართლოსთან დაკავშირებით საერთოდ არავის აქვს კითხვა. წარდგენილი იყო როგორც მოსარჩელის პოზიციები, ასევე ჩვენი პოზიციები და ამ საკითხზე კითხვა არავის გააჩნია. სტრასბურგის სასამართლო გადაწყვეტილებას იღებს მტკიცებულებების საფუძველზე და ხელმძღვანელობს სამართლებრივი ნორმებით და არა პოლიტიკური აღქმებითა და შთაბეჭდილებებით“, – განაცხადა შეხვედრის შემდეგ რატი ბრეგაძემ.
იუსტიციის მინისტრის, რატი ბრეგაძის განცხადებით, სტრასბურგის სასამართლომ უარი უთხრა მიხეილ სააკაშვილს ვარშავაში გადაყვანაზე და სახელმწიფოს არ დაავალა ქვეყნის შიგნით მისი სხვა სამკურნალო დაწესებულებაში გადაყვანა.