სასტუმრო „ყვარელი რეზორტის“ მიმდებარე ტერიტორიაზე აქციის მონაწილეებსა და სამართალდამცველებს შორის სიტყვიერი შელაპარაკება ფიზიკურ დაპირისპირებაში გადაიზარდა.
აღნიშნულის შედეგად პოლიციამ ტერიტორიას 10-ზე მეტი ადამიანი განარიდა.
იმყოფებიან თუ არა, სერგეი ლავროვის ოჯახის წევრები საქართველოში – მედიაში გავრცელებული ინფორმაციის მიხედვით, რუსეთის საგარეო საქმეთა მინისტრის ოჯახი კახეთში, ქორწილისთვის ემზადება.
სოციალურ ქსელში გავრცელებული ცნობების მიხედვით, წვეულების გადახდა, „ყვარელი რეზორტში“ იგეგმება, თუმცა ის, რაც მედიაში გავრცელდა, უარყვეს თავად სასტუმროს ადმინისტრაციის წარმომადგენლებმა. მათ განაცხადეს, რომ ინფორმაცია სიმართლეს არ შეესაბამება.
სასტუმრო „ყვარელი რეზორტის“ მიმდებარე ტერიტორიაზე იმყოფებოდნენ რადიკალური ოპოზიციის წარმომადგენლები. ისინი აცხადებდნენ, რომ რუსეთის საგარეო საქმეთა მინისტრის, ლავროვის ოჯახის წევრები, ნამდვილად გეგმავენ ქორწილის კახეთში გადახდას, რაც მათი შეფასებით, დაუშვებელია.
„ერთიანი ნაციონალური მოძრაობის“ ინფორმაციით, „ყვარლის ტბასთან“ მიმდინარე აქციაზე პარტიის რამდენიმე წევრი და სამოქალაქო აქტივისტია დაკავებული.
„ნაციონალური მოძრაობის“ ყოფილმა თავმჯდომარემ, ნიკა მელიამ ყვარელში, სასტუმრო „ყვარლის ტბასთან“ ჟურნალისტებს განუცხადა, რომ ლავროვის ოჯახის წევრების საქართველოში ჩამოსვლა პუტინისა და ლავროვის მხრიდან ვულგარული ცინიზმით გამორჩეული დამოკიდებულებაა.
ამასთან, „ერთიანი ნაციონალური მოძრაობის“ წევრის ლევან ბეჟაშვილის განცხადებით, დაირღვა ანტიოკუპაციის შესახებ საქართველოს კანონი.
„სანქცირებულია ხალხი, რუსული იდეოლოგიის ხალხი, დღეს იმყოფება საქართველოში ხელისუფლების ხელდასხმით და ამაზე რეაგირებას არ ახდენენ. ამიტომ, ბუნებრივია კახეთის „ერთიანი ნაციონალური მოძრაობის“ წევრები აპროტესტებენ, ამავდროულად მთელი საქართველო უნდა დადგეს ფეხზე“, – განაცხადა ბეჟაშვილმა.