კახეთში, სასტუმრო „ყვარლის ტბასთან“ მიმდინარე აქციაზე ადმინისტრაციული წესით 16 პირი დააკავეს.
ვრცელდება ინფორმაცია, რომ დაკავებულთა შორისაა „დროას“ ლიდერი, ელენე ხოშტარია. სავარაუდოდ, მან თელავში სამართალდამცველებს ფიზიკური შეურაცხყოფა მიაყენა. ინფორმაციას ამის შესახებ რადიკალური ოპოზიციის წარმომადგენლები ავრცელებენ.
რაც შეეხება ყვარელში სასტუმროსთან, განვითარებულ მოვლენებს, სადაც აქცია „ნაციონალური მოძრაობის“ ორგანიზებით იმართება, ვითარება მას შემდეგ დაიძაბა, რაც სასტუმროს ტერიტორიიდან მიკროავტობუსი გამოვიდა. აქციის მონაწილეებმა მიკროავტობუსს კვერცხები დაუშინეს, რასაც სამართალდამცავებსა და აქციის მონაწილეებს შორის სიტყვიერი დაპირისპირება მოჰყვა.
გავრცელებული ინფორმაციით, რუსეთის საგარეო საქმეთა მინისტრის, სერგეი ლავროვის ოჯახის წევრები იმყოფებიან სასტუმროში, სადაც სავარაუდოდ, წვეულება უნდა გაიმართოს. აღნიშნულ ინფორმაციას არ ადასტურებს სასტუმროს ადმინისტრაცია. გუშინ გავრცელებულ განცხადებაში ნათქვამია, რომ რუსეთის საგარეო საქმეთა მინისტრის, სერგეი ლავროვის შვილის „ყვარლის ტბაზე“ სტუმრობა სიმართლეს არ შეესაბამება, ლავროვის გვარით სასტუმროში სტუმარი არ ფიქსირდება და არც აქამდე დაფიქსირებულა.