ევროკავშირის მიერ დაწესებული სანქციების მიუხედავად, რუსული ნავთობი ევროპაში მესამე ქვეყნების, განსაკუთრებით – ინდოეთის გავლით მაინც ხვდება.
ამის შესახებ Spiegel-ი წერს.
გამოცემის ცნობით, ინდოეთის პორტებში ყოველდღიურად რუსული ნავთობით დატვირთული, სულ მცირე, ორი ტანკერი ჩადის, რაც თვეში 70 ტანკერს შეადგენს. გარკვეული დროის შემდეგ, ამ ნავთობის ნაწილი ევროკავშირში ხვდება.
2022 წლის დეკემბრიდან ევროკავშირში რუსული ნავთობის ზღვით შეტანა აიკრძალა, ხოლო მიმდინარე წლის თებერვლიდან ემბარგო დიზელის საწვავსა და ბენზინზე დაწესდა. როგორც გამოცემა წერს, ეს არ ნიშნავს იმას, რომ რუსული ნავთობი ევროპაში გადამუშავებული ფორმით მოხვედრას შეწყვეტს, უბრალოდ, ახლა ეს ძვირადღირებულ და მრავალკილომეტრიან გზას ნიშნავს.
ანალიტიკური კომპანია Kpler-ი, რომელიც სწავლობს მიწოდების გლობალურ ქსელებს, აღნიშნავს, რომ, სანქციების დაწესების შემდეგ, ტრანსპორტირების რეორგანიზაცია მოხდა. კერძოდ, რუსული ნავთობით დატვირთული ტანკერები იგზავნება არა დასავლეთის ქვეყნებში, არამედ – აღმოსავლეთის ქვეყნებში: თურქეთში, საუდის არაბეთში და, პირველ ყოვლისა, ინდოეთში.
ინდოეთის დასავლეთ სანაპიროზე რამდენიმე ნავთობგადამამუშავებელი ქარხანაა, სადაც ხდება რუსული ნავთობის გადამუშავება ბენზინში და დიზელში. ამ ფორმით ხვდება ის ევროპის ბაზარზე.
Kpler-ის მონაცემებით, აპრილში ინდოეთმა ევროკავშირს ყველაზე მეტი საწვავი მიაწოდა. როგორც მიმწოდებელი, ის უსწრებს საუდის არაბეთს. მაგრამ, საუდის არაბეთისგან განსხვავებით, ინდოეთი არ არის ნავთობის მარაგის მქონე ქვეყანა.
ინდოეთი არ უჭერს მხარს მოსკოვის წინააღმდეგ სანქციებს და პირიქით, თუ ადრე რუსეთიდან ნავთობის იმპორტი ზედმეტად ძვირი და მძიმე იყო ინდური კომპანიებისთვის საზღვაო მარშრუტის გამო, ომის დაწყებისთანავე სიტუაცია სწრაფად შეიცვალა და რუსეთი გახდა ინდოეთისთვის ნავთობის უდიდესი მიმწოდებელი.
გასულ თვეში ქვეყანამ დღეში ორ მილიონ ბარელამდე რუსული ნავთობის იმპორტი მოახდინა, რაც მისი ეროვნული საჭიროების თითქმის 40%-ს შეადგენს. უკრაინაში შეჭრამდე ეს მაჩვენებელი, დაახლოებით 1%-ს შეადგენდა.
როგორც გამოცემა აღნიშნავს, ის ფაქტი, რომ ნავთობის ნაწილი შესაძლოა, ევროპაში მოხვდეს, მართალია გადამუშავებული სახით, უკანონო არ არის, რადგან გადამუშავებული პროდუქტები ინდურად მიიჩნევა. ამავდროულად, ინდოეთში “ვადინარის” ნავთობგადამამუშავებელი ქარხნის, თითქმის 50%-იანი მფლობელი “როსნეფტია”.
გასულ კვირას ევროკომისიის პრეზიდენტმა, ურსულა ფონ დერ ლაიენმა განაცხადა, რომ რუსეთის წინააღმდეგ ევროკავშირის სანქციების ახალი პაკეტი შეიცავს შეზღუდვებს მთელ რიგ უცხოურ კომპანიებისთვის, რომლებიც მოსკოვს სანქციების არიდებაში ეხმარებიან.