პრეზიდენტმა პუტინმა დაუშვა რამდენიმე დიდი სტრატეგიული შეცდომა, როდესაც შეიჭრა უკრაინაში, ნაწილობრივ იმიტომ, რომ მან არ შეაფასა სათანადოდ ომის დაწყებამდე უკრაინელების შესაძლებლობები, მათი სიმამაცე, მონდომება, გამბედაობა, მაგრამ ასევე მან სრულიად არასათანადოდ და არასწორად შეაფასა ნატოს მოკავშირეები და პარტნიორები, როდესაც საქმე ეხება ჩვენს მზაობასა და მზადყოფნას უკრაინის მხარდაჭერის თვალსაზრისით, – ამის შესახებ ნატოს გენერალურმა მდივანმა, იენს სტოლტენბერგმა განაცხადა.
„ჩვენმა მხარდაჭერამ უკრაინელებს მისცა საშუალება დაებრუნებინათ ტერიტორია. ჩვენ ვნახეთ ჩრდილოეთით, კიევის გარშემო, სადაც მათ ფაქტობრივად გაათავისუფლეს ბევრი ტერიტორია. შემდეგ ვნახეთ აღმოსავლეთში და ხარკოვის გარშემო, სამხრეთშიც ვნახეთ და ხერსონში. ასე რომ, უკრაინელებმა უკვე აჩვენეს შესაძლებლობა, გაათავისუფლონ კუთვნილი მიწა, უკან დაახევინონ რუსებს და ამიტომაა ნატოს მოკავშირეების მხარდაჭერა მნიშვნელოვანი.
რა თქმა უნდა, ნატოს წევრებმა მეტი უნდა გააკეთონ და სწორედ ამიტომ ვაძლიერებთ მხარდაჭერას. მე ვახსენე საბრძოლო ტანკები, შორი მანძილის რაკეტები და მფრინავების მომზადება. რამდენიმე მოკავშირემ განაცხადა, რომ გადაამზადებენ მფრინავებს. ასე რომ, მე აბსოლუტურად დარწმუნებული ვარ, რომ უკრაინას აქვს შესაძლებლობა, ნება, გამბედაობა, მაგრამ ასევე, ნატოს მოკავშირეებს აქვთ ვალდებულება, გამოვლენილი მზაობა, რომ მხარი დაუჭირონ უკრაინელებს,რათა გაათავისუფლონ საკუთარი ტერიტორიადა უზრუნველყონ, რომ პრეზიდენტმა პუტინმა არ მოიგოს ომი“, – აცხადებს სტოლტენბერგი.