ჩრდილოატლანტიკური ალიანსის გენერალურმა მდივანმა, იენს სტოლტენბერგმა კიდევ ერთხელ გამორიცხა უკრაინის ნატოში გაწევრიანების შესაძლებლობა რუსეთთან სრულმასშტაბიანი ომის პერიოდში.
ამის შესახებ მან მარშალის ფონდის მიერ ორგანიზებულ ბრიუსელის ფორუმზე განაცხადა.
სტოლტენბერგმა თქვა, რომ ალიანსში უკრაინის მომავალ წევრობას ყველა წევრი ეთანხმება, რაც ჯერ კიდევ 2008 წელს ბუქარესტის სამიტზე ითქვა და მას შემდეგ “არაერთხელ განმეორდა”.
რაც შეეხება უკრაინის ალიანსში შესვლის გზას, სტოლტენბერგმა აღიარა, რომ „ნატოში ამ საკითხზე განსხვავებული მოსაზრებებია და ალიანსში გადაწყვეტილების მიღების ერთადერთი გზა – კონსენსუსია“.
„ახლა მიმდინარეობს კონსულტაციები იმის შესახებ, თუ როგორ უნდა დაკმაყოფილდეს უკრაინის მისწრაფებები ნატოში გაწევრიანებისკენ. ვერავინ იტყვის, როგორი იქნება საბოლოო გადაწყვეტილება ვილნიუსის სამიტზე“, – დასძინა მან.
სტოლტენბერგმა აღნიშნა, რომ ნატო ახლა ორიენტირებულია უკრაინის, როგორც “სუვერენული და დამოუკიდებელი სახელმწიფოს გამარჯვების უზრუნველყოფაზე, რადგან თუ უკრაინა ვერ გაიმარჯვებს, მაშინ განსახილველიც არაფერია”.
”ომის დროს წევრობის მიღება დღის წესრიგში არ დგას. საკითხავია, რა მოხდება, როდესაც ომი, ასე თუ ისე დამთავრდება,” – თქვა მან.
ამასთან, ალიანსის გენერალურმა მდივანმა აღნიშნა, რომ უკრაინა სრულმასშტაბიანი ომის დროს უახლოვდება ალიანსს, რადგან ის იღებს დასავლურ დოქტრინებსა და მართვის სტანდარტებს და ასევე გადადის დასავლურ იარაღზე.