პრემიერის წლიური ანგარიში პარლამენტშია. დოკუმენტი დღეს ბიუროს სხდომას წარედგინება, რის შემდეგაც ის ფრაქციებს პოლიტიკურ ჯგუფებსა და კომიტეტებს გადაეგზავნება.
ყოველწლიური მოხსენებით მთავრობის მეთაური პარლამენტის პლენარულ სხდომაზე საგაზაფხულო სესიის ბოლოს, სავარაუდოდ 30 ივნისს წარდგება.
მმართველ გუნდში დარწმუნებულები არიან, რომ ირაკლი ღარიბაშვილის ანგარიში ყოვლისმომცველი იქნება და პრემიერი ქვეყნის ყველა გამოწვევას შეეხება.
„საგაზაფხულო სესიის დასრულებამდე, სავარაუდოდ, ეს იქნება 30 ივნისს, პრემიერი წარადგენს ანგარიშს პარლამენტის წინაშე. რა თქმა უნდა, დაველოდებით ამ მოხსენებას, რომელიც იქნება მნიშვნელოვანი ორი მთავარი მიზეზის გამო: ეს არის რეფორმები, რომელიც გასულ წელს განხორციელდა, და ვიზიტები, რომელიც პრემიერ ჰქონდა“, – აცხადებს განათლებისა და მეცნიერების კომიტეტის თავმჯდომარის პირველი მოადგილე გიორგი ჩაკვეტაძე.
„პრემიერი ვრცლად მიმოიხილავს ყველა იმ ეკონომიკურ თუ სხვა სახის შესრულებებს, რომელიც გასული წლის განმავლობაში იყო ქვეყანაში. ალბათ საუბარი შეეხება იმ ღონისძიებებს, რომლებიც მოხმარდა ქვეყანაში მშვიდობისა და სტაბილურობის შენარჩუნებას, ევროინტეგრაციის მიმართულებით გადადგმულ ნაბიჯებს და იმ ეკონომიკური პოლიტიკის მიმოხილვას, რომელმაც გასული წლის განმავლობაში ორნიშნა ეკონომიკური ზრდა უზრუნველყო“, – ამბობს „ხალხის ძალის“ წევრი, დარგობრივი ეკონომიკისა და ეკონომიკური პოლიტიკის კომიტეტის თავმჯდომარის პირველი მოადგილე ეკა სეფაშვილი.