ხელისუფლება კვლავ წარმატებით გააგრძელებს რეკომენდაციებზე მუშაობას, ოპოზიციას თუ აქვს სურვილი, დაეხმაროს საქართველოს ხელისუფლებას, მათთვის ღია კარი ღიაა, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.
პაპუაშვილის თქმით, დიდი იმედი არ აქვს, რომ ოპოზიცია სამუშაო პროცესში ჩაერთვება.
„როგორი წარმატებითაც გავიარეთ ბოლო წელიწად-ნახევარი და მივიღეთ კანდიდატის სტატუსი, საქართველოს ხელისუფლება ასეთივე წარმატებით გააგრძელებს რეკომენდაციებზე მუშაობას. ოპოზიციას თუ აქვს სურვილი, დაეხმაროს საქართველოს ხელისუფლებას, მათთვის ღია კარი ღიაა. მათ წინა შესაძლებლობა გაუშვეს. საქართველოს ევროპული მატარებელი დაიძრა, ისინი ახლაც ბაქანზე არიან. ჯერჯერობით მატარებლის ტემპი არ არის ისეთი სწრაფი, რომ ვერ შეძლონ შემოხტომა, დრო არის. მონაწილეობის მიღება თუ სურთ, შემოუერთდნენ ამ გზას.
სამწუხაროდ, ოპოზიციამ პირველივე ტესტი ვერ ჩააბარა. ბოლო სასესიო კვირაა, გვქონდა კენჭისყრა საარჩევნო კოდექსში ცვლილებებთან, პარტიების დაფინანსების ცვლილებასთან დაკავშირებით, რომელიც იურიდიული პირების დაფინანსების აკრძალვასა და მშპ თანაფარდობის დაწევას ეხებოდა. ეს არის ვენეციის კომისიის და ეუთო/ოდირის რეკომენდაცია. რეალურად, არანაირი კრიტიკული არგუმენტი არ ჰქონდათ, მათ შორის ჩემს კაბინეტში გვქონდა შეხვედრა უმრავლესობასა და ოპოზიციას ე.წ. ლამინირებულ პირადობის მოწმობებთან დაკავშირებით და ეს საკითხიც განვიხილეთ. არვინ იყო წინააღმდეგი, მაგრამ მხარი არ დაუჭირეს, ხმა არ მისცეს ცვლილებას, მხოლოდ ევროპელმა სოციალისტებმა დაუჭირეს მხარი. აქაც ჩანს, რომ ვერ ჩააბარეს პირველივე ტესტი, იმუშაონ შემდეგი ეტაპისთვის. ნაკლებად მაქვს იმედი, რადიკალური ოპოზიცია რაიმენაირად აჩვენებს ნიშნებს, რომ მზად არის, გაიზიაროს პასუხისმგებლობა, განსაკუთრებით იმის გათვალისწინებით, რომ წინასაარჩევნო პერიოდი დაიწყება. საქართველოს ევროპული მატარებელი დგას მყარად ლიანდაგზე, მიგვყავს დანიშნულების ადგილისკენ“, – განაცხადა შალვა პაპუაშვილმა.