„საქართველო შეძლებს მომავალში დამატებითი ელექტროენერგიის წარმოებას, რომელიც საექსპორტოდ იქნება განკუთვნილი“,- ამის შესახებ ეკონომიკის მინისტრმა მთავრობის სხდომის დასრულების შემდეგ ჟურნალისტებთან განაცხადა. ლევან დავითაშვილის თქმით, წელს ქვეყანამ რეკორდული, 13 მლრდ კილოვატ საათზე მეტის გენერაცია უკვე შეძლო. მისივე განმარტებით, საქართველოს სწორედ ამ მიმართულებით არაერთი უმსხვილესი პროექტი აქვს დაწყებული, მათ შორის შავი ზღვის კაბელი, რომელმაც აზია და ევროპა საქართველოს გავლით უნდა დააკავშიროს.
„საქართველოს აქვს ყველანაირი პირობა იმისთვის, რომ იყოს ელექტროენერგიის ნეტო ექსპორტიორი ქვეყანა. თქვენ იცით, რომ როცა ჩვენ ვსაუბრობთ მნიშვნელოვან მსხვილ სტრატეგიულ ინიციატივებზე, ერთ-ერთი ასეთი არის შავი ზღვისქვეშა კაბელი, რომელიც საქართველოს ევროპასთან დააკავშირებს. უმთავრესი მიზანია, რომ ადგილობრივი გენერაციიდან მიღებული ელექტროენერგიის ექსპორტი მოვახდინოთ ევროკავშირში. ეს მრავალმილიარდიანი პროექტია, რომელსაც მრავალი წელი დასჭირდება, მაგრამ ამაში ინვესტიციას აზრი აქვს იმ შემთხვევაში, თუ ჩვენ უფრო მეტი გენერაცია გვექნება. ყველა ჩვენი პროგნოზით, საქართველო შეძლებს, მომავალში დამატებით ელექტროენერგია აწარმოოს განახლებადი წყაროებიდან, რაც მათ შორის საექსპორტოდ იქნება განკუთვნილი.