საქართველოს პრემიერ-მინისტრი გიორგი კვირიკაშვილი ხურჩაში მომხდარ მკვლელობაზე პასუხისმგებლობას რუსეთს აკისრებს.
როგორც კვირიკაშვილმა საქართველოს თავდაცვისა და უსაფრთხოების კონფერენციაზე დისკუსიისას განაცხადა, ეს მკვლელობა მიზნად ისახავს, ძირი გამოუთხაროს იმ პროცესებს, რომელიც ქართველებსა და აფხაზებს, ასევე ქართველებსა და ოსებს შორის მიმდინარეობს.
„რამდენიმე დღის წინ ახალგაზრდა მამაკაცის საზარელი მკვლელობა იყო აღმაშფოთებელი სისასტიკე. რა თქმა უნდა, ქვეყანას, რომელსაც ოკუპირებული აქვს ეს ტერიტორია – რუსეთს უნდა დაეკისროს პასუხისმგებლობა მომხდარზე. მე დღეს დაღუპულის ოჯახის წევრებს შევხვდი. ძალიან რთულია რაიმე უთხრა ამ ადამიანებს, რადგან ისინი არ არიან დამნაშავეები, ისინი არიან მსხვერპლი აფხაზეთში რუსეთის ჩართულობით შექმნილი უსაფრთხოების სიტუაციის.
ეს მკვლელობა მიზნად ისახავს, რომ ძირი გამოუთხაროს იმ პროცესებს, რომელიც ქართველებსა და აფხაზებს, ასევე ქართველებსა და ოსებს შორის მიმდინარეობს.
ჩვენ თანმიმდევრულები ვიქნებით ამ სამშვიდობო პოლიტიკაში. არ უნდა ავყვეთ პროვოკაციებს, არამედ უნდა მოვითხოვოთ რუსეთისგან და დე ფაქტო ხელისუფლებისგან, რომ მომხდარზე ადეკვატური რეაგირება მოახდინონ“, – განაცხადა კვირიკაშვილმა.