სამწუხაროდ ზუგდიდი მაჟორიტარის გარეშე იქნება, – ამის შესახებ ფრაქცია „ქართული ოცნების“ თავმჯდომარემ, პარტია „ქართული ოცნების“ აღმასრულებელმა მდივანმა მამუკა მდინარაძემ ჟურნალისტებთან საუბარში განაცხადა.
ასე უპასუხა მდინარაძემ კითხვას, რა ბედი ეწევა პარლამენტში ზუგდიდის მაჟორიტარის ადგილს, რომლის პოსტს ამჟამად ირაკლი ჩიქოვანი იკავებს და რომელიც ირაკლი კობახიძის თქმით, თავდაცვის მინისტრის კანდიდატად იქნება წარდგენილი.
„საარჩევნო წელს როგორც წესი, [მაჟორიტარობის] არჩევნები არ ტარდება, ამიტომ სამწუხაროდ ზუგდიდი მაჟორიტარის გარეშე იქნება. საპარლამენტო არჩევნების შემდეგ კი მაჟორიტარები აღარ გვეყოლება, მაგრამ სიაში აუცილებლად გვეყოლება ისეთი ადამიანები, რომლებიც განსაკუთრებულ ყურადღებას მიაქცევენ ყველა რეგიონს – სამეგრელოს, ზუგდიდს და ა.შ.“ – აღნიშნა მდინარაძემ.
ერთადერთი ცვლილება განხორციელდება მთავრობაში, თავდაცვის მინისტრის თანამდებობაზე წარდგენილი იქნება ირაკლი ჩიქოვანი, – ამის შესახებ პრემიერ-მინისტრობის კანდიდატმა ირაკლი კობახიძემ მედიასთან განაცხადა.
ირაკლი ჩიქოვანი 2020 წელს „ქართულმა ოცნებამ“ წარადგინა ზუგდიდის მაჟორიტარობის კანდიდატად. მან ხმათა 48,24% (26 085 ხმა) მიიღო და გავიდა მეორე ტურში, სადაც ხმათა 93,88% (31 678 ხმა) მიიღო. 2020 წლიდან არის საქართველოს მე-10 მოწვევის პარლამენტის წევრი (ზუგდიდის მაჟორიტარი), საარჩევნო ბლოკი: „ქართული ოცნება – დემოკრატიული საქართველო“.