ომის პერიოდში, ესტონეთის გავლით რუსეთთან მედიკამენტებით ვაჭრობა 600-ჯერ გაიზარდა. რუსეთში კომპანიებმა ომში დაჭრილი რუსი ჯარისკაცებისთვის საჭირო სისხლის გადასხმის აღჭურვილობები შეიტანეს.
როგორც ყოველდღიური გაზეთი „ეესტი ექსპრესი“ („Eesti Ekspress“) იუწყება, ესტონეთიდან რუსეთში ექსპორტირებულ ერთ-ერთი ყველაზე მოთხოვნად საქონელს სამედიცინო აღჭურვილობა წარმოადგენს, რომლის საერთო ღირებულებამ შარშან და წელს 57,5 მილიონი ევრო შეადგინა.
ესტონეთიდან რუსეთში სისხლის გადასხმის აღჭურვილობის ერთ-ერთი მიმწოდებელია კომპანია „ეკლიპტიკა ბალტიკა“, რომელმაც, რუსეთის საბაჟო დეკლარაციების მიხედვით, ომის დროს აღმოსავლეთ საზღვარზე, მინიმუმ, 13,6 მილიონი ევროს ღირებულების საქონელი გადაიტანა.
„ეკლიპტიკა ბალტიკას“ მიერ შეტანილ სამედიცინო პროდუქციას რუსეთში კომპანია „ემ ფი-მედიკალი“ იბარებს. ეს უკანასკნელი კომპანია „ეი ეფ ქეი-პროჯექტს“ ეკუთვნის, რომელსაც, თავის მხრივ, ასობით სახელმწიფო შესყიდვის კონტრაქტი აქვს გაფორმებული რუსეთის სამთავრობო უწყებებთან, კერძოდ კი, იმ საავადმყოფოებთან, ლაბორატორიებთან და სისხლის ბანკებთან, რომლებიც რუსეთის ჯანდაცვის სამინისტროს ექვემდებარებიან.
კომპანია „ეკლიპტიკას“ ერთადერთი საჯარო საკონტაქტო მისამართიდან გაზეთმა კითხვებზე პასუხი ვერ მიიღო. ეს საკონტაქტო მისამართი ეკუთვნის რუსეთის მოქალაქე ალექსეი ფედოროვს, რომელსაც ესტონეთში ბინადრობის ნებართვა აქვს.
ესტონეთი მედიკამენტებს რუსული ბაზრისთვისაც აწარმოებს
ესტონეთის საგადასახადო და საბაჟო დეპარტამენტმა „ეესტი ექსპრესს“ დაუდასტურა, რომ 2021 წელს ესტონეთის გავლით რუსეთში 5,6 ტონა მედიკამენტი შევიდა, 2022 წელს, – 1190 ტონა, ხოლო გასულ წელს, – თითქმის 3400 ტონა.
რაც შეეხება ფარმაცევტული პრეპარატების ტრანზიტს, ესტონეთი, როგორც წესი, სატრანსპორტო და სავაჭრო მომსახურებას უწევს ევროპულ ფარმაცევტულ კომპანიებსა და დისტრიბუტორებს, რომლებიც ამ ქვეყანას იყენებენ, როგორც დერეფანს რუსეთისთვის საქონლის მისაწოდებლად; ამ ბიზნესის მოცულობა 600-ჯერ არის გაზრდილი.
ესტონეთის საგადასახადო და საბაჟო დეპარტამენტის მონაცემებით, 2023 წელს ესტონეთმა თავად გაგზავნა რუსეთში 260 ტონა მედიკამენტი, რაც 50-ჯერ აღემატება ომამდე რუსეთში შეტანილი ფარმაცევტული პროდუქციის მაჩვენებელს.
ომის პერიოდში „კალცექსმა“ რუსეთს დაახლოებით 67,7 მილიონი ევროს ღირებულების ფარმაცევტული პროდუქცია მიაწოდა, რომლის ნაწილი ტალინის ფარმაცევტულ ქარხანაში იყო დამზადებული.
ტალინის ფარმაცევტული ქარხანაში ესტონურ მედიასაშუალებას განუცხადეს, რომ მათი სათავო კომპანია „გრინდექსის“ წილი რუსულ და ბელარუსულ ბიზნესში მნიშვნელოვნად შემცირდა და ამასთან, კომპანია რუსეთში თავის საქმიანობას ჰუმანიტარული ნიშნით ამართლებს.