შვეიცარიული ფარმაცევტული კომპანია „ნოვარტისი“ დათანხმდა, 4 მილიონი შვეიცარიული ფრანკი შეიტანოს ფონდში, რომელიც ფსიქიატრიულ კლინიკაში მედიკამენტების გამოცდის შედეგად დაზარალებულთათვის კომპენსაციის გადახდის მიზნით შეიქმნა. 12,5 მილიონ შვეიცარიულ ფრანკამდე ოდენობის კომპენსაციის მიღება დაახლოებით 500 ადამიანს შეეძლება.
თურგაუს კანტონმა „ნოვარტისთან“ შეთანხმებას დაზარალებულთა ფონდში ე.წ „სოლიდარობის შენატანის“ შესახებ უკვე მიაღწია. პარასკევს, 2 თებერვალს გავრცელებული ინფორმაციის თანახმად, ფარმაცევტული საწარმო ნარკოლოგიური ტესტების შედეგად დაზარალებულთათვის გადასახდელი საკომპენსაციო თანხების დაახლოებით მესამედს აანაზღაურებს.
1940-1980 წლებში, მიუნსტერლინგენის ფსიქიატრიულ კლინიკაში მყოფ პაციენტებს უნიშნავდნენ პრეპარატებს, რომელთა უსაფრთხოება დამტკიცებული არ იყო. ამაზე პასუხისმგებლობა ეკისრებოდა ფსიქიატრ როლანდ კუნს, რომელიც პირველი ანტიდეპრესანტის აღმომჩენად მიიჩნევა.
თურგაუს კანტონის მიერ გავრცელებული განცხადების თანახმად, ადამიანებს, რომლებიც დოკუმენტურად დაადასტურებენ, რომ 1940-დან 1980 წლამდე ფსიქიატრიულ კლინიკაში სატესტო პრეპარატები მიიღეს, უფლება აქვთ, ფულადი კომპენსაცია მოითხოვონ, – თითოეულმა 25 000 შვეიცარიული ფრანკის ოდენობით. მემკვიდრეების მიერ თანხის მოთხოვნა და მიღება გამორიცხულია.
მიუნსტერლინგენის ფსიქიატრიული კლინიკა ვარაუდობს, რომ განაცხადების რაოდენობა 500-მდე იქნება.
იმდროინდელ მიუნსტერლინგენის კლინიკაში ფსიქოტროპული მედიკამენტების გამოცდის უზარმაზარი მასშტაბი თურგაუს კანტონის დაკვეთით ჩატარებულმა აუდიტორულმა შემოწმებამ 2021 წელს გამოავლინა.
ბაზელის ფარმაცევტულმა ინდუსტრიამ ადამიანებზე ჩატარებული ექსპერიმენტებით სარგებელი ნახა. „ნოვარტისი“ იმ დროისთვის ექსპერიმენტში ჩართული კომპანიების მემკვიდრედ მიიჩნევა.