„ხაზარაძე აშკარად ძალიან ბევრ ფულს ხარჯავს პიარში და ვიღაც ატყუებს. ჩემი კეთილი რჩევაა, რომ პიარის ხალხი შეცვალოს“, – ამის შესახებ პარტია „მოქალაქეების“ ლიდერმა, ალეკო ელისაშვილმა განაცხადა და თქვა, რომ „ლელოს“ ლიდერები არასერიოზულად ლაპარაკობენ.
როგორც მანვე აღნიშნა, არ სურს ოპოზიციონერი კოლეგები გააკრიტიკოს, მაგრამ საშველი არ არის.
„მამუკა ხაზარაძემ რომ თქვა, მთელ საქართველოს საკუთარი მანქანით შემოვივლი და ამომრჩეველს შევხვდებიო. ჯერ ერთი, იმ „ფორდ მუსტანგით“ მთელ საქართველოს ვერ შემოივლის, ზოგან ისეთი გზებია.
ხაზარაძე აშკარად ძალიან ბევრ ფულს ხარჯავს პიარში და ვიღაც ატყუებს. კეთილი რჩევაა ჩემი, რომ პიარის ხალხი შეცვალოს.
ისეთ ფოტოებს და ვიდეოებს დებს, ამერიკელი პოლიტიკოსებისთვის შეიძლება კარგი იყოს, მაგრამ არა ქართველი პოლიტიკოსისთვის.
საერთოდაც, რა სიცანცარე სჭირს, ვერაფრით ვხვდები. ევროკავშირის 9 რეკომენდაციის შესახებ პარლამენტში შეხვედრას არ დაესწრნენ.
ნუთუ ჰგონიათ, რომ „ოცნება“ თავისით დათმობს ყველაფერს? არაფერსაც არ დათმობს, თუ ოპოზიცია ბრძოლაში არ შეჰყვა“. – განაცხადა „კვირის პალიტრასთან“ ალეკო ელისაშვილმა.